Zokam

FULL GOSPEL ASSEMBLY INTERNATIONAL MINISTRY

TIN JUBILEE

Full Gospel Assembly International Ministry USA pawlpi kum 10 cin dong a vanglian khut tawh hong kha ih biak Pasian in minthan na ngah masa ta hen! Tu ciang ciang gual zawh na hong pia Ebenezer Pasian tung ah lungdam ih ko masa hi. Tulsa a om pawlpi mi te leh  mundang a om te, leitung mun  tuam tuam ah online pan hong en a hong kikhawm te na vek un, Tulsa khuapi pan in na khut kong len uh hi. Shalom!
  Nopna note tungah hong om tahen! Pasian in a ma minthan na ding in a pawlpi kum tampi a vanglian khut tawh hong kha paisuak lai tahen. Amen.

Pawlpi kipat na thu:

Full Gospel Assembly International Ministry pen December 18th, 2003 in The State of Oklahoma pan in license ki ngah hi.

Pawlpi mihon biakpiak ki khop ki pat ding pen Pasian deih na leh phalna a hun cih te thunget na ki nei to to in, 2007 September kha sung in Topa kiang pan in lamlak na hopih na aw kician ki ngah a hih man in, kikhop na ki pat dingin khensat na ki nei pan hi.

Full Gospel Assembly International Ministry pawlpi biakpiak na pen October 7, 2007 ni Holiday Inn [ Mohawk Hall ] 5000 E. Skelly Dr. Tulsa, OK 74136, U.S.A ah Topa sawlna leh upna tawh ki pan khia a, tua ni in Tulsa khuasung a om kawl gam mi u le nau te mi 80 in hong lungdam pih in hong uap uh hi.

Thu bulphuh laisiangtho mun: Matte 16:18

Hih suang tung ah ka pawlpi ka lam ding hi. Hell khua kong khak te in tua pawlpi a zo kei ding uh hi. { Upon this rock, I will build my church and the gates of hell shall not prevail against it.}

Pawlpi  ih ngiim na thu bulpi te:

  1. Kawlgam pan a hong pai a, US lei tang ah teng a, nuntak na ding na sem in lungsim pumpi tawl a, a bah te, hi pawlpi ah hong kipawl khop na, thunget khopna , biakpiak khop na man in khalam leh leitung lam ah no suak na leh lawh cin na ngah nang.
  2. Sumpi tuam tuam te piak na tawh Kawlgam ah kha mang thang te mat nang mission nasep na ah panpih zawh na ding.
  3. Nopna leh dahna ah khat leh khat vanh ki puakpih zawh na ding.
    1. Pawlpi ki khop na tuamtuam te, home cell , antan thunget, ah ki hel kim in khat leh khat ki meltheih in nop kisak na ding.

    Pawlpi kipat pan tu ciang pawl pi sungah Siampi na sem teng:

    1. Rev. Dr. Dam Suan Mung – Senior Pastor
    2. Rev. Vung Za Niang           – Associate Pastor & Secretary
    3. Rev. Pau Khan Mung         – Associate Pastor
    4. Pastor Bukai Ayarla             Pastor
    5. Pastor Thawng En Thang   – Pastor
    6. Pastor Khin San Maw         – Pastor { Sem non lo }
    7. Pastor Van Hnuai Kim        – Pastor
    8. Pastor Gin Sawm Piang      – Pastor

    Pawlpi upa a sem masa pen teng:

    Full Gospel Assembly International ah pawlpi upa kiteel na 26 July 2009 in ki nei a, mi 9 ki teel in pawlpi upa a sem masa pen teng:

    1. Pa Cia Pau                 6.  Pa Ngin Do Khup
    2. Pa Lian Go Pau 7.  Pa Sing Za Lian
    3. Pa En Khan Khai 8.  Lian Bawi
    4. Pa Kham Kap Thang 9.  Lun Bawi
    5. Pa Langh Khan Thawng

    Pawlpi upa khat in kum thum sung sem in kum thum cin ciang ki khel diamdiam in, kum sawm sung upa sepna tawh pawlpi it na deihsak na tawh citak in mapang khin sa te kheempeuh tungah pawlpi tang in lungdam na lian pi kong ko uh hi. Pasian in na innkuan ciat uh lawhcin na hong pia ta hen.

    Naupang lam {  Sunday School } tawh ki sai 2007 to 2017 tu ciang dong pawlpi ah hong kipia khia teng:

    1. Siamah Kim No    { A makai pi } 5. Siamah Lamh Nu
    2. Siamah Lun Nu 6. Siamah Saan Lun {Sem non lo}
    3. Siamah Nem Huai { Sem non lo } 7. Siamah Cing No
    4. Siamah Ciin No 8. Siamah Vung Boih

    Naupang a lian zaw deuh teenage { Calab class } te hong makaih sak , pilna tam pi hong hilh sak Sianu Dr. Dim San Nuam { Nuam Pi } tung ah nakpi tak in lungdam na pawlpi in ki ciam teh hi.

    Sunday Adult Bible class ah Sunday ni pi ni zing sang 9 am pan 9:45 am sim in, tu laitak a Siampi na seem te ki khel in hong hilh sak uh hi. Tua hun ah kawlpau leh zopau in ki hilh a, online pan zong ki ngai kik thei hi.

    Pawlpi ah Kum 2007 pan 2017  tu dong pawlpi sum keem te:

    1. Rev. Pau Khan Mung – 2007 to 2011
    2. Pa Ngin Suan Mung  – 2012 to 2013
    3. Pa Dal Suan Kham       2014 to 2015
    4. Pa Vungh Thawn Mang – 2016 to 2017

          Full Gospel Assembly International Ministry Pawlpi ah kum sawm sung thuman na cihtak na tawh pawlpi ah sumpi hong khia te online pan hong khak te tung ah Topa in hong ciapteh sak tahen. Vantung kong khak te hong in thupha tampi hong pia ta hen. Kum sawm sung sumpi ngah na sazian pen laibu ah ki ciamteh a, kum sim in kumcin ciang in sum keemte in hong pulak khin tek a hih man leh ih pawlpi privacy ding in, online ah a mal in hong ki suak sak kik non lo hi. Hong dong nuam ten pawlpi sum kemte tung ah ki dong thei hi. Kum sawm sung sumpi cihtak na tawh hong kepsak te tung ah pawlpi  in lungdam na lian pi ki ciam teh hi.

          Full Gospel Assembly pawlpi membership tawh kisai in 2007 kum pawlpi kipat hun in membership form ki bawl nai lo a, 2008 ciang in ki bawl pan a hih man in kipat kumsung a mi phazah tawh ki ciam teh hi.

    Pawlpi kum sawm sung pawlpi mi khantoh na:

    2017 kum October ni 8 ni dong inn kuan bul inn 233 leh mi mal in 997 ki pha hi. Tu ni dong inn lei khinsa inn kuan 87 pha ih hih man in Pasian min ihphat hi. A lei nai lo te zong hun a cin ciang lei ni, upna tawh ngak ni, inn thak hoihzaw in hong ngak hi.

             Tu kum 2017 ki pat kumthak pan in pawlpi sia a hi thei teng in pawlpi mi te inn siik kim in kumthak thupha puak kawm in kum 10 cin  na pawl pi sung ah tulai tak a te leh hong lut thak te kigawm in mi a omtak pi te min sazian { census ] ki bawl na tungtawn in hih a tung a te ki suak sak a hi a, a mi om lo address ki thei lo zong om hi.

        Pawlpi min sazian update bawl thak na ah hun tampi bei in Computer tawh sazian hong khum sak lai file ah hong koih sak Pa Cinh Pau tung ah lungdam na lian pi pawlpi in kiciam teh hi. Pawlpi  Membership pen pawlut lai a original form file ah ki nei a, computer file ah zong ki ciamteh a, laibu file thak ah in zong ki ciam teh hi. Pawlpi mi te thusim { privacy} ding in kum 10 cin ni in lai in zong ki hawm lo in online ah zong ki koih lo ding a hih man in, a thei nuam ten dotnop a om leh et kiphal a, ih pawlpi list pen kua mah copy ki pia lo ding hi. 

    Nop na leh dah na thu te:

             Pawlpi Kum sawm sung in ih pawlpi ah ih it mah mah khang no lai mi 6 in leitung hong nusia in van innpi ah hong ciah san hi. Dah na khitui tampi tawh han mual ah ih kha ciat hi. Pawlpi kum 10 cin ni in a mau te zong ih phawk mah mah ih ngai mah mah a, a lungzuang khuangai te ei te kheempeuh Topa in nop na daih na hong pia tahen. 

                Nop na thu ah pawlpi kum 10 cin sung in, Mo ki teeng kop 14 ki om a, pawlpi dang ah ih mo khak te zong a om hi. Suan le khak tanu tapa nei zong tampi mah ki om hi. Zeisu gum pa leh Topa in sang in gup khiat na a kitel thak in, tui ki phum mi 86 ki om hi. A lungdam huai pen khat ah a ki mu thei lo khalam khanlawh na lianpi ih pawlpi ah hong tunga tu dong kha biakpiak na  hun te a kizom suak lai a hi hi. Ih pawlpi leh ei te minthan na ding hi kei hen la, a vandaitui  tawh hong nelsak den hong ompih den ih  Topa  minthan nading bek mah hi tahen.


    Pawlpi ki khop ziate:

    Pawlpi kipat 2007 pan in nipi ni sim in zo pau 10 am pan 1 pm, kawl pau tawh  2 pm pan 4 pm biak piak na 2 vei ki nei hi. Kawlpau hun ah Pastor Bukai in hong makaih a, a ma tung ah zong lungdam na kiciam teh hi.

    Full Gospel Assembly nu mei pawl pen 26 June 2009 in ki pan hi. Kum 10 sung numei ma kai ngei president te a hi uh Nu Pum Ngaih Niang leh Nu Man Nuam Nel leh panmun len teng, tung ah lungdam na ih ko hi. Anpal leh khutpham te hong puak den te, Tuesday ni tak sim nu pi thunget na ah lawptak in hong kihel te leh paisuh paitoh na ah mi hong dawn sak te mission nasep na ding leh kawlgam ah tagah naupang te huh na ding a, lawmbawm tawh hong pan pih pawlpi ah a citak nupi te kheempeuh tung ah pawlpi in lungdam hong ko ung.

    Full Gospel Assembly khang no youth pen 18 January 2009 ni pan in ki pan hi. Kum 10 sung khangno makai ngei te Ngin Do Khup, Ngin Za Khai, Ciang pi, Hon Pi, Cin Thang leh panmun len dang te, makai dang teng khangno sungah lawptak a hong kihel te tung, lungdam na kiciamteh hi. Pawlpi choir hong makaih Pa En Khan Nang, tangval Mung Tawng leh lasa khangno tampi te in nipi nisim pawlpi hong etlawm hong nosuak sak a hih man in lungdam na lianpi kiciam teh hi.

    Full Gospel Assembly Sunday English service pen 1 June 2014 ni in ki pan hi. Tu ni dong mi te lawptak leh thangah tak in kikhop kizom suak hi. Minam dangte zong khat veivei hong ki khawm uh hi.

    Pawlpi sung na sep na tuam tuam te:

         Pawlpi sung ah 2007 pan 2017 kum 10 sung ah pawlpi ah pawi ih neih ciang in an nek tuidawn ding hong huansak hong vai hawm a gim a tawl mi tampi te tung ah lungdam ih ko hi.Biakinn ah a kisam bang bang inn tek lungsim tak tawh hun pia a van den Cin Kap,Kap pi,Thang pi,leh a lawm te, biak inn vanh khat peuh a siat sim in inn teek lungsimtak tawh a hunlap in hong bawl sak den te kua ma theihpih lo a thatang hong ki pia khia te, a gim a tawl te, lungdam na nakpi tak in pawlpi in hong ko ung. Lai ah konggelh khak lo kei theih lo te zong Topa Pasian in no te tungah thupha tampi tawh hong thuksak ta hen.

          Pawlpi ah 2007 pan tu dong kum 10 sung pilna siam na tuam tuam tawh  khut ki len a hong pang khawm te a hi, Leitung in Pasian thu a zak nang a hong zat Media Pu Sum pi & group, a zak nop huai tumging namkim tawh hong makaih Music group, Aw te limtak ih zak nang hong makaih Sound System lente, biak inn sung et lawm nang a hong bawl lighting group te, la leh laimal te lim tak ki muh nang a hong lak siam Power point len te, Lungsim kheempeuh tawh lalam ah hong makaih Worship group te, carparking leh tut na mun nuam te limtak tut theih nang hong makaih Usher hong sepsak pawlpi upa leh khang no te tung ah pawlpi pan in lungdam ih ko hi. Topa in no te kheempeuh a lamdang in thupha tawh hong thuk in hongzang semsem ta hen.

         Pawlpi biak inn ah Good Samaritan clinic zato hong ki hong a, mitam pi ten phat tuam na ki ngah in ci na lu na tam pi tak in dam na ngah uh hi. Tua lai ah hun tam pi hong pia, sia vuan te siamah te, lai tawh ciapteh na lam a na sem te, cina thu nget sak te, kam phen sak te hong ki pia khia ei pawlpi pan leh pawlpi a tuam tuam pan volunteer te tung ah lungdam na lian pi hong ko ung na ci uh dam ta uh hen.

          Pawlpi ah home cell mun 11 ah Friday ni taksim in ki nei hi. Home cell ah hong makaih te kheempeuh Topa in na innkuan uh ah hong makaih ta hen la, thupha kician mah mah in hongpia ta hen. Ih Pawlpi pan in sum leh paai tawh hong ki huh zawhloh hang in Malakhi 3:16 ah a cih bangin no te sepnate Topa mai ah hong kiciapteh sak ta hen!

    Biakinn leh mawtaw lei na:

    Full Gospel Church Building leh [ A huang sung ah Sia inn khat tawh ] 11 August 2011 ni in US $ 900,000.00 in ki lei a, 30 October 2011 ni in Topa tung ah biakinn hong piak lungdam koh na leh aap na ki nei hi. Tulsa biakinn pi leina ding a hong huh hong pan pih te kheempeuh tung ah lungdam hong ko ung. Biak inn ih lei ding ciang in hong huh leh hong pan pih Sizang Burmese Mission Church Maryland pawlpi tung ah nakpi tak in lungdam na kiciam teh hi. Biak inn huang kiim ah a etlawm mah mah phuitong paak kung hong suan inn kuan tampi te, singkung te a hin na dingin, nisim tui hong buak sak Pa En Khan Nang tungah lungdam na pawlpi in ki ciam teh hi. Na inn kuan un singkung bang in hong hing sak ta hen la,  paak bang in hong etlawm sak ta hen.

    Biakinn vai tuam tuam leh siangtho nang [ House Keeping ] lam ah August 2011 pan March 2012 dong Pa Neng Kho Hau in hong sep sak a, April 2012 pan April 2015 dong Nu Ciang Thian Vung, May 2015 pan tudong Pa Cin Lam Khai te inn kuan in, hong sepsak hi. Mihon tawh nasep na ah haksat na tampi na thuak nate uh Pasian in hong theihpih tahen, no hang in ih biakinn et lawm hi pawlpi bup lungdam ung.

    Pawlpi mawtaw [van] 2007 model khat 15 May 2012 in ki lei a $14,000.00 ki pia hi. A dang mawtaw [van] 2015 model khat mah 2016 in ki lei a, $ 23,000.00 ki pia hi. Ih mawtaw neih a ki pan tuni dong mi dawn na, mi khak na hong hawlsak En Sian Mung,Kam Lianta,Lian Bawi, Cin Kap leh a dang te na vekpi tungah lungdam na hong ko ung.

    Pawlpi Antan thunget na:

          Pawlpi kipat a ki pan in tudong Saturday nisim in,10:00 am pan 1:00 pm dong antan thunget ki nei a, tukum kum 10 a cin dong pasian hehpih na tawh kizom suak in khalam ah thupha tampi ki ngahin nuam kisa mah mah a, mi 100 kiim bang in thunget na ah ki hel den thei hi. Pasian in ih thunget na tampi hongdawng a, zumvai buaina te suakta, hong tung thak tam pi ten nasep ngah, Malaysia pan in inn kuante hong tung, inn lei thak, natna pan cidam, vai haksat na pan suakta mi tampi omhi.

    Pawlpi Mission nasep na tawh ki sai:

    Pawlpi nipi sum lut pan sawm a khat tawh kawlgam mission na sep na ki pan pih hi. Mission te ah biak inn mun lei nang cih te a ki sap hun hun in sum pi ki tuam don sak lai in ki panpih hi. Tua ban ah Yangon khua ah om FGA pawl pi biak inn lam nang leitang lei na ding upna kamciam ki dong in huh na tam pi kipuak khin hi.

    Full Gospel Bible Training Center [ FGBTC ] sang naupang te sang sum leh an nek ding man pia zo lo te mi mal huh na tawh kum sim in mi 40 bang sponsor ki pia hi. Kawl gam pan hong pai Pasian na sem te leh gam leh lei a ding a hong zin te zong itna sunsiah ki guan hi. Hong zin sia te ih haksat huhnget na te zong a kisam bang in huhna ki pia hi.

      Tulsa  Pawlpi pan in sia te, pawlpi mi te a hi thei bangin kawlgam leh gam dang te ah va zin in pawlpi van kawm, mission na sep na van kawm leh a kisap na mun te ah gupna thugen in va paizel uh hi.

      Thu khup na:        

          Full Gospel Assembly International Ministry pawlpi mi kheempeuh tung ah lungdam na hong ko ing. Na teel theih ding uh pawlpi tampi a om  kawm kal ah ko tawh khut ki len ding a nong teel a nong khensat uh thu pi hong sa ung, lungdam ung, hong it ung, hong ngai ung. Ih ki pawl khop na hang in na tawl na bah na pan un, na kha, na lungsim uh nosuak ta uh hen. Na dah na khitui te hong nulsak tahen la Pasian gamzai na ding in ma pang khawm ciat ni, hun hoih zaw tampi hong pai lai ding hi.

    Tu dong eite hong tawn pih ih biak Pasian tung a lungdam na lian pi ih ko hi. Amen!

    Tu ciang ciang Topa in eite hong huh hi.
    { Thus far the Lord has helped us }
    1 Samuel 7:12
    Praise the Lord!!

    Khazih itna sung ah,
    Rev. Vung Z. Niang
    Associate Pastor & Church Secretary
    Full Gospel Assembly International Ministry

    Oct 15,2017