TU KHANGHUN PASIAN PHAT DAN LEH BIAK DAN

TU KHANGHUN PASIAN PHAT DAN LEHBIAK DAN  By:Rev. PS Za Tuang

Mizoram ah: A hunhunin khanlawhna tung a, a tuamtuaminkilang hi. Mizoram leh Zogam sung khanlawhna pan en dih ni.

Mizoram ah khanlawhna atun masak hun lai-in, khuangtum nuam uh hi. Pawlpi-in phal lo ahih manin khuang tum nuamten Biakinn ngah lo uh a, a tawpna ah pawl tai uh hi. Amautenthatang tawh Pasian phat nuam ngiat uh a, a ging theithei zanguh hi. Tua bangin khanlawhna tuihual pen mikhat peuhin amangah loh mana theisiamlo leh sanloh hang tawh khak zawh hiloa, damdamin Biakinn ah khuang zat ding hong thukim uh hi. Hun hong paipai a, khanlawhna hong tung leuleu a, khuangpi bek deihkhop loin, khuangpi leh khuangneu tumkhawma lasa-a, lam hong ut leuleu uh hi. Pawlpi in zel aw a ciphial zongin san kul ahih manin sang leuleu a, Biakinn ah khuang 2, alian leh a neu kizang hi.

Zogam ( Chin State) ah : Hun khat lai-in lungdamna thu ahkhanlawhna tung a, “Piangthak” cih kammal kilimzat hi. Tuakhanlawhna ah gupngah kitelna (Kha Siangtho teci panna) mitenngah uh a, a lung uh dam lua in, kitel sinsen uh hi. A ngahlotepen a piangthak loin ngaihsun pah uh hi. A thu ah bel atuam luahilo a, kitelcianna angah lote leh a ngahte a neih uh kibang hinapin pawl khat ten a neih lam uh kitel a, pawl khat ten nei napi, a neih lam uh thei mel lo uh cihna hi.

Tua bang thute hangin pawlpi sungah kitelkhialhna pianga, pawl kikhenna om ngei hi. Ahang pen Lai Siangtho sung ah, “Savun um lui sungah lenggahtui thak thun ken,… puakkhamding hi” a cih bang hi a, Kha Siangtho pen mihing pilna in telsiamlo ahih manin, a ngah ten lah kingahsak lua, a ngah lo ten lah umlo uh ahih manin kitelkhialhna piang ahi hi. Hun hong paipai aKha khanlawhna hong tung a, a lungdamten, “Halelui-Jah” cih limzat mahmah leuleu uh hi. A lawpthakloten/ a piangthak masa ten Halelui-Jah cih sese kul salo uh a, a lawp ten lah Halelui-Jah aci nuamlo te milui ci uh ahih maninkitelkhialhna om hi. Tuhun ciang namdangten lim zat mahmahta ahih manin zat ding mahin ngaihsun thei panta ihi diam, izang pianpian ta hi.

A phawkhuai thu : A tunga thute phawk kawmin, ei hunahzong khanlawhna leh ahun zuia Pasian nasep dan, mihing tenPasian i phatnop dan telsiam kisam ding hi. Ei hoihsak dan lehzat ngei dan ahilo khempeuh deih lo leh umlo-a i om leh deihdankibatpih teng bek tawh i om dinga kitam theilo ding hi.

Nidang lai-in mi khat, luipi geiah tuin thawl neukhatsungah tui sung thapai hi. A thawl dimkhin napin thunthun laiahih manin minten, “Bang dinga tua tui thun thapai na hiam?Na thawl lah dim ta aî ci uh hi. Tua mipa in ìHih luitui khempeuhthawl sungah thunkhit a sawm ka hi” ci hi. Nang leh kei hoihsakdan leh theihna bekah mikhempeuh kita lo ahih manin hih mipai bat khak loh nadingin pilvanhuai hi.

Pawlpi makai Sia, Upate, Nupi leh Papi ten i makaih mipitematphak ciang theihsiam a kul hun om hi. Makaih hun om a, ngak kawma amaute zia tawh tonpih akul hun zong om hi. I hihngei dan bekbek cileng khantohna Khalam-salam ah omlo dinghi. A beisa kum 30 pan tuni dong ihih ngei dan khek kei leng akhangto lo hi ding hang a, i biakinn, a sunga vanzat te, i silh iten, i lasakte, i piakkhiatna a ngeingei hitheilo hi. A kip den dingkhat bek om a, tua pen i Doctrine( Thu-up te) ahi hi. Tua loadangte; Kimakaih dan, Biakpiak dan cihte pen ahun zui-in leha khang a khangin kikhelkhel ding hi. Hun leh khang akikhelmah banga tua dana om siam a sinte pawlpi khangto uh hi.

Tu khanghun mite zia : Tu khanghun pen lam hun hi khading hi. Pasian mite ihi a, leitungmite ahi zong lam nuam kisa a, kilam ziahziah mai hi. Tu khanghun pen na khempeuh kinawh mahmah ta hi. Pasian phata a lamte nangawn lam zalzal uh a, la zong sa zangzang uh hi. Kum 50 tunglam ten sakpih man nawn lo.

Music zong vitvit sa-in kitum a, ging ngaih theithei deih uh hi. Khanlawhna tetek pen ei khang masate hun laia khuang tumdanleh tulaiate khuang tumdan nangawn kibang nawn lo hi. Music zong khuang 2 bek mah Biakinn sunga om ding isak ding hilo hi. I Biakinn sungah Drumset, Guiter, Key Board te koih ding mulkim liang cih bang a om ding hilo hi. La i sak ciangzong khuang 2 leh Key Board Tempo zui-in sa leng tha kingahzaw hi. Khuang kimakaihsak hun hi nawnlo a, Tempo maan takpen khuang in zui leh nuam zaw hi. Tua banga a tum siam te bekin khuang tum ding hun hita hi. I tu-le-ta ten a neu tung uh panMusic a zak uh pen khuang 2 sanga hoih zaw hi a, hong vakkhiat theih uh ciang tukhang music vanzat-te mah hong siam uh ahihmanin, khuang 2 dihdih te in a lung uh len lo hi.

Kim khat ten khangthakte khuang tum siamsak ding hi ci uh hi. Ken bel siamsak kul sa nawn keng, hih pen mi culture-a i taanna khat ahih manin, i tate pen tulai vanzat siamsakin, zatpih leng kolpi khat akiphel hi dingin ka um zaw hi. Zomite bel i vengte khuang2 in tuazahpi-in i lung hong kuai lua lo hi. Siam sawm sangin manghilh mengmeng leng hoih zaw in um ing. Amau zong a khangthak te un deih lua nawn kei.

Hih khuang 2 dihdih bek thusak ding hi lo hi. Zomite Tra- ditional musical intrument zong hilo hi. Ei khuang bel a tunghiuhiau khat hi zaw hi. Ahi zongin tulai Music vanzat-te a om leh a siam takpite bekin tum ding hi. Biakinn sungah kuamah kisin tawm loin a siamsaten makaih a picing tak leh nuam taka Pasian phatna mun ding ahi hi. Nipi kal khat sunga Pasian tawh i kizopna hun tamlo cikte pen meet taka i zat theih manpha pen ding hi. La zong ei hun laia khanlawhna late khawng mah tawh a kikhanglo ding i sak leh ana hi khin lo hi. Ankhing bek thusa lo-in anthak tawh khangthak te vaak ding kisam hi. Tu hunate tuhun tawh vaakin makaih leng khangto mahmah ding hi hang.

Hih bang hunah om ihih lam i theih khak keileh i tate ei theih dan leh deih dan ah nungkaih kha ding ihih manin pilvan huai dingin ka tuat hi. Mi kimkhat ten Biakinn sungah Music ngaih deihlo lua, sermon nangawn awliatna zatman awmlo phiala ngaihlo ding deih uh hi. Khangthak ten tua dan pen deihkhop lo uh hi. Ataktakin cini cileng, khangthakte bek zong hilo, ei khangmasa ten zong, a nop dan i ciapkhak loh man hi a, Music anuam khoma gin ngaihin hih leng i lungsim hong zo thei pan hi. Music zong ngaih pian ding, lasa te zong siam ding, lungsim takpi tawh Pasian phatna/biakna hunin zanghin lasa ziahziah leng kikhop nuama, akik ding kingaklah hi. Tua dan hilo a, ngeina lui bang bek tawh lawplo pipi a biakna hun zat pen kisum mahmahhi. I ngaih penpen te omna i lunggulh kinken mah bangin, Biakinn lungulhna i neih theihna omsun pen lungsim khempeuh tawh Pasian phat anopna i phawkna ahi hi.

I gensa bangin tu khanghun pen kinawh mahmah ta a, Pasian phata lam ziahziah hun hi ta hi. Hih lamna pen thu-up tawh kisai hi lo a, phatna ahih manin leitung Christian pawlkhempeuh in a kham zawh loh uh ahi hi. Kham ding hilo a, Pasianmi khempeuhte zat ding ahi hi. Ahoih khempeuh PenticostalPawlpi akici zawdeuhte ading bek sakha kei ni. Pasian a phatzote pawlpi leh mimal khang hanhan ding a, Pasian a phat lomimal leh pawlpi gamdai ding hi. Lam ding, lasa ziahziah ding, Music tum ziahziah ding, khut beng ziahziah leng nuam mahmahdinga Pasian zong heh lo ding hi.

Ahi zongin pilvang ni : Khangthak pawlkhatte leuleu Pasian zahtak lopi a mangkangte hih dan, midangte hih dan cih theihnabek tawh sepna bel lawhching lo hi. Pasian phatna leh biakna ahih manin siamna lak nuamte muh thadahhuai lel a, a kisiamsak te chimtaakhuai lel hi. Pasian ah eiman nuamsa photphot leng miten nuamsa pan uh a, mite lawpsak dingin ei siam hong kisa ding cih ngaihsutna tawh tuhun dana cih gawp pen, miten hong en ngamlo liang zawsop uh a, a mai uh zum lua thei hi. Eimah ngiatin Pasian a phat takpi ihih nakleh miten tha ngah in ei tawh Pasian phatkhop nuamsa pan uh hi. “La sa ve vua, lam vevua, lungdamlo maw” cihcih ding hilo hi. Ei laam, ei diang, ei lungdam peuh leng miten i melah lungsim takpi tawh Pasian i biakna i phatna mu peuh le-uh tha ngah ding uh hi.

Music zong, gin ngaih kisam ahih sam hangin, i phat Pasian ahih lam nangawn kitel lo lianga music bek buaipih zong val lua veve hi. A ngaih ding mah hi a, ahun ciang khat theih kisam hi.

Khut betna: Biakinn kimkhatah solo, thugen,ntecipang temuakna in khut kibenga, a tawp uh ciang lungdamna in khut kibeng hi. Biakinn kimkhat ten tuate zangh nuam lo uh hi. Biakinn sungah khut bet pen naupan vai, Pasian zahtak loh vai ci uh hi. Ahih hang la sa le uh beng veve uh hi. Lasak ciang bet leh adanga khut bet kibanglo ci uh hi. Kei ngaihsutna ah, annekma a zudawnte zu dawn mah hi a, an nekkham ciang zudawnte zong zu dawn mah hi a, an leh sa tawh zu a mehte zongzu dawn mah in ka tuat hi. Tua mah bangin khut bet khempeuh ahun tawh kisai loin Biakinn sunga bet ahih nak leh akibanginka tuat hi.

Pasian pahtawia khut bet lasak bel hoih a, mihing pahtawia khut bet hoih lo ci uh hi. Ahih hang Pasian in note khatlekhat na kipahtawi un ci hi. Biakinn sungah kipahtawi ding lau kei ni. A taktakin cileng, i zahtak mahmah khat pen Biakinn sung ahi zong pahtawi nuam veve lel hang. Biakinn sung i zahtak mana khut abeng nuamlo hilo zaw in, i cih ngei dan ahih loh mana paulap abawlbawl ihi zaw hi.

Ei kimuang loin mite bek thupi sa khakei ni: I thugenteenkik leng, Mualtungmite sungah, Halelui-Jah aci masa Zomite, khut a beng masa Zomite, praise and worship a zangh masa Zomite ihi a, ahi zongin kimkhat ten i sang nuam pak kei a, i vengten ei nungah a zat uh ciang lah hoih sain i zangh veve hi. Pasian in Zomite mi nungah hong koih loin, Kha thu tawh kisaina hoih khat peuh hong theisak masa napi, i um kei zel a, mi cih khit ciang lah i zuikik veve hi.

Tua ahih manin tupan kipan a umlah Thomas bang hi loin, upna tawh Kha thu ah a madawkte hih sawm ni. Khanghun zuia Kha Siangtho nasep dan theih sawmin, mi tampite atazoKhapilna leh leitung pilna a neite suak ni. Mite i etteh leh a khatnaihi ngei kei ding a, ei i kimuan ciang bekin khatna i ngah theipan ding hi.

Source :Laitai April/2016

no comment

Add your comment

Your email address will not be published.

%d bloggers like this: