SATAN’ KAWLNGIAN

SATAN’ KAWLNGIAN

(By: )Rev. Khai Khan Suan, DD

(1Pit.5:8; Heb.11:6)       

Egypt gam pen leitung etsakna, Faro pen Satan etsakna, Egypt gam a saltaang Israelte pen tuhun thu-um mite etsakna hi. Egypt gam a uk kumpite pen ‘Faro’ kici hi. Tua pen mi’ min hi loin a zaa’ min hi a, a khiatna pen inn golpi (great house) cihna hi.

Mipil khat in a genna ah, gal cih pen kizo thei lua hi, aih hang a kizo thei lo khat pen Pasian’ lungsim a tuak mite kizo thei lo hi, ci hi. Tua ahih manin hahkat a Pasian a zong mite le upna tawh Pasian a bia taktakte pen a hawk thei humpi in zong a cih nading thei lo hi. Tua bang miten noptuamna thupha ngah pelmawh hi, ci hi.

1. Naungek pasal khempeuh that un(Pai.1:22)

Faro(Satan) in Egypt gamah Israelte pung lo dingin Israelte naungek a suak pasal khempeuh meklumin Nail gunah paih ding thupia hi. Hih pen thudang hi loin ei hong dep kha leh, ei sangin tamzaw kha leh cihna hi. Pasian in mihing a bawl lai-in pungin khang unla leitung dim in, zo un a cih tawh kilehbulh ahih manin tua pen Pasian lang-dona (Satan’ Kawlngian) hi gige hi. Tu hun teh Satan in kumpite le mipilte zangin nau khak ding, nau hal ding, nau suksiat ding, …nau dal ding cihte kiuanggen mahmah hi. Hih zong pun loh nading a Satan’ Kawlngian khat hi gige hi.

Bishop Felix Lian Khen in, leitung ka zin kawikawina ah condom kiuanggen lua ahih manin ka khasia, ci hi. ‘Jesus saved’ kicih nading munah ‘condom saved’ ci-in Zeisu munah condom kikoih tazen hi, ci hi. Bang hang cihleh tua zatna tawh mi kipung nawn lo ding cihna ahi hi. Tu ni-in Zeisu min tawh hong gen ning, pun ding khan ding a khak khempeuh Satan’ aa hi. Tuate khem-peuh i inn sung i gam sungah bei ta hen! Pun ding khan ding a Pasian hong deihsak-nate tangtung zaw ta hen! Tua thute ah hoi kha loin Pasian’ kammal mah kipletzaw ding hi hang.

Satan in mihingte’ khamit hong hum sak hi. Gup ngah a kibehlap ding pen a hih theih tawpin khaktan hi. Gil sung a om nau-ngek a suaksiat mah bangin piangthak ding-te susia hi. A lawp pian khat om leh nuaitan-suk cih zong kha lamah Satan nasepna mah ahi hi.

2. Hih munah bia vou (Pai.8:28)

Faro in Mawsi kiangah na Pasian uh suakta takin hih laiah bia vou, ci hi. Tua pen a phal tawh kibang napi a ngiankawipi hi. I cih mah bangin tu’n dawimangpa’n bang sem hiam cih leh kikhel se kul kei, zu ne, za-tep sa-in zong vantung gam kitung thei lua hi, cih tawh mi tampi hong khem hi. Greek lai-in mihingte dinmun thum a genna ah, sukikos a cih pen piangthak lote a genna hi a, sarkikos pen piangthak napi a samite hi-in cilesa tawh kidimte hi, pneumatikos pen khami cihna hi. Pasian in khami dingin hong deih hi. Dawilutte nangawn a sung a dawi tawh kihoin paupau a hih leh ei Kha Siangtho nei-ten i sung a Kha Siangtho tawh kihoin i pau-pau ding ahi hi. Cilesa tawh kidim luatna pen Egypt genna ahih manin tua panin paikhiat ding pen Topa deihna hi. Tua ahih manin thu um lo mi tawh hakkol puakhawm lo lim-lim ding hi ziau hi.

Greek lai-in ‘ekklesia ‘ a kici pen tuhun pawlpi a genna hi a, pawlpi pen leitung mite lak pan a kisamkhia saptuamte hi. “Bia lel un” cih pen Pasian mite adingin a piang thei lo thu hi. Khazih sungah a om mi in alui nate kikhelin athak a piang zo hi (2Kor.5:17) a cih nungsang leitungnate/mite tawh kigawm-khawm le kibangkhawm ding cih pen piang thei lo hi, paisan ding ahi hi.

3. Gamla pai kei vou (Pai.8:28)

Mawsi in Faro kiangah ka paikhiat loh phamawh hi, a cih ciangin Faro in gamla pai kei un, ci hi. A kul leh zong a kilehkik ziau thei ding gamgi ciang khawng bek pai un, a ci nuam ahi hi. Hih pen gamgi pianthakna hi. Gamgi pianthak cih pen zusai ah zong mi tawh kilawmta thei, dawn khawm thei lel, biakinn sungah lah makai lanlan thei, alang alang hi kawikawi thei nuntakna hi. Tua ding deihna’n Satan in gamla pai kei un hong ci hi. Ahih hang Pasian in siatna tawh kipelh a gamlapi ah i taisan ding hong deih hi.

Mang.3:15-16 ah Laodicia pawlpite, Topa Zeisu in a laikhakna sungah, no pen lum pelpal mawk ucin, ka kam sung pan hong siakhia ding hi’ng ci hi. Laodicia khua pan tai 6 na ah tuisa phulna (hot spring) ciktui omin tua pan tui lain a khua sungah tungsak uh hi. A tui lakna gamla ahih manin khua sungah tua tui a tun ciangin sa nawn loin lum hithut a om pen Topa Zeisu in Laodikia pawlpite tua tawh gentehin na vot uh leh vot vet unla, na sat uh leh sa vet un. vot lah vot lo sa lah sa loin na om uh leh ka kam sung pan kong siakhia ding hi, ci hi.

Mawhna le leitung nate khempeuh gamlapi ah i taisan ding Topan hong deih hi. Zawtah in zong mawhna pen gamlapi ah taisan hi. A zing ciang ‘Pi, sep ding a om hia’ ci-in va kitah kik se loin taisan vingveng a, thong sung dong tai hi. Lot’ zi tai loin nunghei ahih manin cikhuam suak hi. Tua ahih manin cilesa tawh a kigawmkhawm nuntakna le sami hihna pan khami hihna ah tai-in nunghei loin sialsial nawn loh ding ahi hi.

4. Pasal teng bek pai un (Pai.10:10)

Piancil sungah pasal amah bek a om ding hoih lo hi, Pasian in ci hi. Tua Pasian’ kammal lehdoin Faro in pasal teng bek in Pasian bia un, ci hi. Pasian in pasal tangtat loin numei zong tangtat loin biakhawm ding deih hi. Joshua in kei le ka innkuanten Topa ka bia ding uh hi, ci hi. Naw-ii zong tuiciin pan suahtak nadingin a zi a tate mah tawh tembaw sungah lutkhawm uh hi. Tua mah bangin ei zong kinusia loin Pasian a bia dingin i vekin kuankhia ding hi hang.

Tua ahih manin Satan Kawlngian ahi  pun loh nading, mawhna paisan loh nading, mawhna le cilesa deihnate pan gamla pai-khiat loh nading le pasal teng bek pai un, cih khemnate sungah puk loin, tua Satan khemna Kawlngian khempeuh gamlapi ah paisanin innkuan kim pawlpi kimin upna tawh hahkat takin Pasian biain a pung ding, a khangto ding le Pasian’ maipha ngah dingin mimal kim Topa’n thupha hong pia ta hen!

#(BAG Nipi hungelna pan)

#Zang Awngging pan kila kik hi.