Pi Ciin Cing kum (70) in ongnu sia

Lam etlohpi in FGATulsa Pawlpimi  ahi Pa Sing Za Lian, Pa Thang Khan Suum (FGATulsa Media pu) leh Tg. Lian Cin Thang (Vice President FGATulsa Youth) te pianna nu ahi Pi Ciin Cing kum 70 in Jan 8,2014 ni zingsang nai 8:30am in Phaiza khua a inn panin tawntung tawlngak na Pa angsung ah ongzuat ta hi.Pi Ciin Cing pen tulaitak FGATulsa Pawlpi kem Rev. Vung Za Niang leh Tulsa khua om ahi Neam Khan Cing @ Nu Neam te in ni hi-in FGATulsa pawlpi leh khuapih tuipih uleh nau a kua mapeuh in amau tawh ki bangin dahna lianpi ipu lak hi.

Pi Ciin Cing Thangthu a tom in

Pi. Ciin Cing pen kum 1943,June 6 ni-in Thuklai khua ah  Pu. Tun Sing(Thatmun) leh Pi Dim Uap te sung pan nasuak hi.

Pianpih lai zom teng 

Pu. Kham Khaw Zam (D)Nu-Ciin-Cing

Pu. Cin Khai(D)

Pi. Thang Cing (D)

Pi. Khai Za Niang

Pi. Neam Za Niang(D)

Sangkah na leh nasep na

Tanlang pan tan 9 dong Thuklai High School ah nakah in, Jan6,1968 pan Nov 30,1969 dong Yangon Nausuak  Zatopi ah nau dompilna nasinhi.Hih asang kahsung mahin Kalaymyo (Kawlpi)Zatopi ah zong semkawmhi.Yangon panin sang aman khit ciangin kum July 9,1971 ni-in Phaiza khua ah Zato konghonna neihsak in,tua lai munmah ah 2005 Pension alakdong minam leh khua leh tui adingin deihsakna tak tawh semhi.Zato lamah asep sungin Phaiza bek hilo Thalmual leh khua kiim khua pamah ah nausuak sak leh natveh in asun azan cilo in paikawikawi hi.

Pasal neihna leh Suan leh Khak te

Pu. Vial Khaw Dong leh Pi. Eng Khaw Zam te tapa Pu. Son Za Khup (Gualnam)tawh Oct 18,1972 nakiteng uhhi.Tapasal 5 leh tanumei 1 neihi.

Tate teng

Pa. Dong Sian Niang & Nu. Ciin Za Lian (Champhai,India)

Pa. Sing Za Lian & Nu. Vung Thian Uap (Tulsa,USA)

Nu. Zam Za Cing & Pa. Tun Lian Tuang  (Tedim)

Pa. Cin Khawm Pau & Nu. Vung Deih Man (Phaiza)

Pa. Thang Khan Suum & Nu. Man Dim Huai (Tulsa,USA)

Tg Lian Cin Thang (Tulsa,USA)

Atu teteng :

Lia  Cing Sian Man……(Pa Dong Sian Nang ta te)

Tg. Khup Khat Suan

Tg. Thang Lian Mawi

Lia Cing Tawi Lian …..(Pa Sing Za Lian  tate)

Lia Vai Thian Huai

Lia Khup Sian Kop

Lia Cing Khawm Lun ….( Nu Zam Za Cing tate)

Lia Cing Sen Lian

Tg. Nang Sian

Tg. Khup Sian Sang

Lia Vung Lun Muan

Tg. Khup Khua Muan ….(Pa Cin Khawm Pau tate)

Tg. Khai Mun Sang

Pi Ciin Cing ongnusiat na tawh kisai in abeisa lungdambawl kiim akipan aci ongnuam phamel lo in nikhat onggaw gawpin tua a,kipan khua zong hoih tak phawk mel lo,an zong hoih tak nezo mel lo in a omhi a,hih laisan napen cih zong nei tuan lohi.Lungtang nat leh sikhang natna nei in,ong nusiat lai tak inzong nasa cih bang om lo in ihmu kawmsa in vantungpa kiang ah ong ciah san ahihi.Pi Ciin Cing pen akua ma tek in itin,adamloh aki pan khua nu khuapa te leh mun tuamtuam pan in nat veh in ki pai ngei ngaihi.Tu in zong si gal ding Yagon,Tedim,Thuk lai,Champhai pan leh khua kiim khua paam pan in u leh nau zomi te pai san ngei ngai lai tak ahihi.

Pi Ciin Cing tawh atawpna pen hunnunung zatkhop na Jan 9,2014 in aluang hawm leisung ah ki tuh ta dinghi.Tulsa khuapi ah anusiat atu ate kiang ah zong FGATulsa Pawlpi inn tek naleh khuapih tuipi teh vaihawm natawh Pa. Sing Za Lian inn 802 W 119 Th Pls Jenks,Ok 74037 ah hehnep tutpih na ki nei ding hi.

Topa’n anu siat apasal atu ate khempeuh ong hehnepsak ta hen.

FGATulsa Media Group

no comment

Add your comment

Your email address will not be published.

%d bloggers like this: