PASIAN ZAT MINAM

Rev.Dr.S.Pau Khan En in CCJ Khawmpi ,Tedim ,Nipini (Nov.28, 2010) sunkikhop aa athugen na

PASIAN ZAT MINAM ( The Peoplefor God)

Zosuan tate khempeuh in i ngaklah leh i lam etet i minam sung ah ong tualbual masa pen leh lai nei nailo Zosuan tate a ding aa lai hong bawlsak Sangmang Cope Topate nupa hongtun kum 100 cinna pawipi bawl thei ngawngaw ihihman in tung Pasian’ min phat masa hang. Minthanna khempeuh Pasian in tangta hen!

Sim leh maal aa om Zosuan tate leh leitungbup aa kikhenthang a aom Zosuan tate khempeuh aw, tuni in natuntun, na-omomna mun uh ah lungdam un. Khatvei kong cikik hi. Na omom natuntun na mun uh-ah lungdamta un. Khuang leh zam tum unla, Topa min phat un. Phit leh daaktalte tum in Topa minphat un. Hanla sa unla minsial un. Topa’ min phat un. Thau khempeuh lawn unla Topa min phat un. Organ, piano, ketboard, guitar tum unla, Topa min phat un. Tumging khempeuh tum unla Topa’ min phat un.

Banghanghiam cihleh, “Amah in tuma kum 100 lai in ama’ nasem Cope Topate nupa lei pang khat pan in igam ilei ah hongpuak in amaute tungtawn in na lianpi hong sem khia zohi.” Topa phat un! Khuamial sungah amangthang a om eite khempeuh alamdang khuavak hong tunkhin zohi. Topa phat un!

Lai nei ngeilo Zosuan tate lai hong bawlsak in, pilna hong guan aa, sing dang namdang tetawh tanbangin hong kim sakhi. Topa phat un! Tang aa tuan aa tualthat minamte, kido kithat in phu kila aakhut aa sisan bangte lungdamna Thu (gospel) tawh hong siansuahhi. Topa phat un! Ngawngtan, lutan minam kimlai, kha mangthang zong siampi nam hongsuah zohi. Topa phat un. Topa phat un! Khatvei kong cikik hi. Zosuan tate khempeuh aw, na tuntunna, na omomna khempeuh u’ah tuni in Topa phat un! Tuni in amah phatna bekbek gen in sa unla, mual leh guam thawnsak un. Hallelujah Lapi sa unla mual leh guam thawnsak un. Banghanghiam cihleh Amah eite’ kiang ah kum 100 hong tualbual khin zohi. Topa phat un!

Maw! Cope Topate nupa leh kum 100 sung aa Pa’ kiang hong zuatsan Pasian nasem misiangthote, Pawlpi upate leh thu-um misiangthote khempeuh aw tuni in na tuna uh vangam nuam Pazadih pan in na laukha un hih kumza cinpawi hong zo, hong siim unla, ko te tawh hong lungdam khawm un. Banghanghiam cihleh I Topa in eite mawhna sung ah si aa I om laitak in nuntak tawntungna ah hong galkah pih zohi. Topa phatun! (Pasian minthang tahen!)

Zosuan tate khempeuh aw lungdam in kipaak un. Banghanghiam cihleh, eite hong it aa aluang hong paai in alu hong phum Cope Topa leitung beidong aa i ngilhloh i phawk den nading in “Cope Phawkna Biakinnpi” eite’ khualai ah hongpo khin zohi. Tuma kum 50 lai, 1960 kum in hih Tedim khuapi mah ah Cope Topate hong tun kum 50 cinna pawipi kibawl aa, tua lai ah tualsung sangmang masa Rev. Thang Ngin ii makaih Khuathum Pawlpite in lakhat hongsa uh aa tua la asakkik (chorus) ah,

“En un ei khamtung Khuavak amu nailo mi[pawlte aw31leader

Na lu phong ve un, Pasian tawh hong paikhawm

Ei Khawmtung khuavak puak dingin

America Cope Topa hong tat thuap I hi

Amah hong kipia ei Khamtunggam ah”

Hitakpi hi, Hitakpi hi! Tuni aa nang leh kei, pilna lam ah nuntak khuasakna ah, silh leh ten ah, hiciang dinmun itun theihna in leipang khat pan in Pasian tawh hong paikhawm American Cope Topa, ei Khamtung gam leh ei Zosuantate ading hong kipumpiak Cope Topate tat thuap ihihi. Lungdam in Topa phat un!

Tua lai aa la kisa kaphawklai la nihna in Cope Topa tawh ma pangkhawm Rev. Vial Nang’ Pawlpi, Tonzang Pawlpi pan ahihi. Amah thugen ding pen ding zo nawnlo in, ama’ kiginna khempeuh amuan mahmah tua lai aa tangvalno, tu’n Dr. Gin En Cin (Dr. Gin En Cin na omleh na omna pan hong ding pak dih oh!) in gensak aa tua khit ciangin Tonzang Pawlpi in la hongsa hi.

“Cope Topate hongsep maban zom,

Nelson Topate innkuan hongsep ong bawlnate

Sangmang Hau Go te innkuan hong pattahna

Aban zomding Tedim gambup hi

Nungak tangval hamciam un” cihi.

Hanciam ngei hang aa, nungak tangval, kum1985 kum in Cope Topate hongtun kum 75 cinna pawipi nasia takin bawlkhin in, kum 100 cinna pawipi bawltheita hihang. Topa phat un! Kongit Zosuan tate khempeuh aw, abeisa kum zakhat sung sangmang Cope Topate tawh hong paikhawm in i minam sung ah hong tualbual khin Pasian tung ah lungdamna thu i ko zo hi. Tu in tua kum 100 sung ei mihingte lampan in sepkhialh bawlkhialh, kalsuan khialh leh hawmkhialh, gelkhialh ineihte khempeuh kisit pha in, Pasian kiang ah thumanna tawh thuumkik ding hihang.

Zosuantate in kum zakhat ma, Pasian lungdamna Thu hong tunma aa ikithah, ikimat, iki-aih zah liang ahihloh hangin, Khristian suak in lungdamna thu  i-pomkhit nangawn in, tam veipi ih Pawlpi sangin ibeh, iphung, igui, inam, i ultungsak zaw hi. Taanglai ki-uk zia, kipuakzia mah ciingciing lai in, to leh sal lungsim mah I paaipaai lai aa, i kigim neih sim niloh hi. I tenna mual leh guam hong halna zui in kuam lungsim, tual lungsim (localism) luahsak, sunglutsak in thu khempeuh tua mittang tawh ih enhi. I tenna mual leh guam hong khenna hang in, i kampau, i mukpau tawmtawm akilamdanna, akibat khit lohnate ultungsak in, kikaak kibalna in i neihi.

I Khristian Pawlpi mahmah zong upna kibatlohna hang in maw, utna kibatlohna hang in maw, tupna kibatlohna hang in maw, lawpna kibatlohna hang in maw Pasian khat bia in Laisiangtho khatbek mah azang hihang cici napi in, i kikhensuksuk mai aa, Pawlpi sung ah thubuai khatpeuh a om ciangin, lemtuah damsak ding sangin phelkhap aa at khiat ding I lawpzaw hi.

Pawllungsim khauhpailua ahihman in, isisan kibatpih dangte idonman nawn kei hi. Ki-it kilem ding leh kipawl ding i gengen a, ataktak ciangin I kinensuahsuah hi. Minam itding igengen aa ahun ciangin ikibal nennen hi. I khangttangthu hibang in apai tohtoh aa, i Pawlpi tangthu hibang aa atuahsuksuk leh bel, mai lam ah ih Pawlpi leh ihminam khen-sawm, khen-za kisuahin ahatzaw sang omlo in, kiamsuk leh manthan dingbek hita dinghi.

Tua ahihman in Zosuan ta ulehnau te aw, abeisa kum 100 sung aa Pasian’ tungah ih mimal mahmah ikhialhna imawhnate hang in lungsim kitamkham, kitamzan in thuumkik dihni, Ibeh iphung in midangte tung ah, khutkhialh, bankhialhna, tatkhialh, hekkhialh ineihleh thuman taktawh Pasian tung ah, thuumkik dihni. I khua itui in Pasian tung ah tatkhialh, heekkhialhna ineih khempeuh thuumkik dihni. I Pawlpi bup in kua’ Pawlpi, kua’ Pawlpi cilo, Pasian mai ah ihcintaak lohna khempeuh phuangkhia hohin mawh maina ngendihni. I minam bup in icinlahna, iginatlohna khempeuh Pasian kiangah pulaak in Thungen khawm dihni.

Tu in Pasian in abeisa kum 100 sung aa, i mimal,ibeh, iphung, ikhua, itui, iPawlpi leh iminam bup a ibawlkhak mawhnate hong maisak takpi zoho. Eite zong khat leh khat imawhna ikimaisak ding kisamhi. Tu mahmah in nalawm nagual tung ah, midang khatpeuh tung ah nakam, namuuk in, na gamtatna tawh khialkha in mi’ lungsim nuamlo in nakoihkhak a omhiam? Tuanu tuapa hih mun ah a om kei lehzong, nakhua natui natunkik phet in, “khialkha ing ei, ong maisak o” cih nasawm hiam?

Tua bangmah in midangte in nang hong nasak kha in, lungnuamlo in hong koih leh zong maisak hoh dih in. Banghanghiam cihleh, mi lungnuamlo aa koihna leh, midangte mawhna khahlo aa khihna in Pasian Thupha nangahding hong liah hong dalhi. Jubilee akhiatna in, “mawh kimaisakna leh suahtaakna” hi. Tuate lo in I kumza cin pawipi in khiatna neilo dinghy. Bawl thaman omlo dinghi.

Tu-in abeisa kum zakhat sung I nuntak ziate i-enkik zotahi. Banghanghiam cihleh mailam kum zakhat adding I kalsuanzia ding khungkholnuam ihihman hi.Khang tangthu kansiam mangkang mipil Arnold Tonbee in, “Nung lamthu kan masa lo in, mailam kikalsuan theilo hi” cihi. Mailam kum zalom khat adding gal et in, tu in akal khatna suan kipan tading hihang. Tuabang aa mailam ikalsuan nading in, mihon tuamtuamte tung ah, anuai aa bang in hih mun pan in thu kong vaikhak nuamhi.

1.      Pasian nasem khempeuhte tung

Pasian teel Zosuan’ta Pasian nasem khempeuh aw,

Abeisa hunlai bangin ikibatlohna tawmkhatte gengen in nei nawnlo in, ikibatna tampite bulphuh zaw, ultungsak zaw in khut kilen in, Pasian’ na semkhawm dihni. Zo’suan Thuzui mite leh, Zosuantate khempeuh in kikhen kitap cimtaakta uhhi. Kitapna ii lawhman pualah ta uhhi. Kikom, kihuai, kikem kidon in, munkhat ah kalsuan khawm nuamta uhhi. Pasian’ nasemte, akhenkhamte hilo in, ahuaikik, agawmkik dingin Pasian in ei himun pan in vaipuak hong piazo ta hi.

Pasian nasem Zosuantate khempeuh aw, Pasian Thu igenna ah, mihing zaknop ding thute bek gen nawnlo in, tanglai kamsangte bangin, Pasian’ Thudik, Thuman otpih dihni. Thuman ideihkaihkaihna in thuman in i minam hong nusia dektahi. Thudik i hem gengenna in, thudik in hong taisan dekta hi. Kum zalom sawmnih sung aa Pasian’ Thuthuuk Theology siam Karl Barth in, “Leitung bup nakhel nopleh, na pulpit pan in pankhia in” cihi. I Pasian Thu genna athuukzaw, asangzaw in kalsuanpih dihni.

I Pasian nasepna pen Pawlpi sungbek hilo in, leitung bup adding ahihi. I tenna, itualbualna, igam ilei leh I omna mun khempeuh ah Pasian’ gam akizelhtheihna dingin gam leh lei, khua leh tui, leh singkung lopate aa koipan, kiim le paam khual in, don in, ukna nei mite tawh khut kilen in puahkhawm, zuun khawm dihni. Hih in kum zalom thak aa a hong kalh i Pasian’ nasep ding ahihi.

2. Pawlpi upa leh Thuzui mikhempeuh tung ah

Amunmun aa om Pawlpi makaite, upate leh Thuzui mikhempeuh aw,

Abeisa hun in Pasian’ Pawlpi pen hunbit nasemte adingbek in kingaihsun in, sepding khempeuh amaute bek ikhiatkha hi. I khial hi, i khial phamahmah hi. Hih kum za pawi pan aa kipan, Pawlpi nang aa ahihlam thei in, Pawlpi sung ah sungtang inla, Pawlpi ading nungta in. Pawlpi kipatcil lai aa Pawlpite’ ii pa ahi, Tertullian in, “Pasian Pa aci khempeuh in Pawlpi pen Nu ciding uhhi” cihi. Pawlpi itna anglum sung ah nungta in, khangto aa, Pawlpi tawn in leitung ah nasep khiatding ahihi.

3. Hausa-upate tung ah

Khuakim, tuikim aa om Zosuanta hausa leh upate aw,

Na ukna khuakhua uh ah no mau mah kumpi nahihlam uh hong phawkpha unla, I mite leh igam ilei, singkun lopa hongcing hongkem siam un. Thuman cihtakna leh, deihsakna tawh igam hong uk unla, igam sung ah daihna leh kilemna a om theihna dingin, itna leh hanna tawh khua leh tui hong ukta un. Lau kei un. Hang un. Pasian in no Zosuante ukding aa “panmun” leh “zaa” hong piak na hi uhhi. Igam, ilei kolh khin hi. Ilei hoih teng luangsuk mangkhinta hi. I gamsa leh itui sung ganhing khempeuh cii mangkhin hi. I gam halhalna lam in, igam pawn mangkhin hi. Khua hun man thei nawnlo in, guah azuk ding hun in zu nawnlo aa, ankhing ikham zo nawn keihi.

Hausa, up ate aw, hih mun pan in ibiak Jesuh min tawh hong zasak ing. Na khuakhua, na gamgam uh ah, Zuzuak thaikap leh amanlo nuntak zonna khempeuh hong khaam ta-un. Gamhal, meihal hong khaam unla, igam ilei singkung lopa nim dildial dingin hongpuah hong zuun un. Hong uk kumpite, biakna makaite leh kumpi nasemte tawh khut kilen in, igam ilei leh imite hongcing hong keem ta un.

4. Nai-ngan-zi (Politician)Makaite tung ah

Pasian in pilna, ciimna, kivakna leh siamna apiak teelna ngah Zosuanta nai-ngan-zi makai khempeuh aw,

Nang Pasian in nainganzi kivakna hongpiak pen hibang hun aa na Zosuan mipihte huaiding, huu ding leh panpih ding aa hongsawlna ahihi. Nang leh na naihuai ading bek sakha kei in. Na kuam, nataang nazaisak leh, namin, nazaa, naliim navaang hong kip dinghi. Tungsiahte maipha muhtheihtheih nading bek ngaihsunlo in, netcip thuak aa husang zolo, azawng daaipaam tate, cimawh liangvaite’ lam ah pangin, amaute’ suahtaak nading khuasak khantoh nading, Moses bangin hanna tawh iminam leh igam ilei, uk leh makaih hong tumh ta un.

Kum zakhen aa iminam leh igam ilei a makaihding “No” na hi uhhi. Biakna nasem makai, kumpi nasem makai, kumpi nasem uliante tawh zingvai hong hawmkhawm in, nautangte lungtaina leh luphot nadingin hong makaihta un. Lau kei unla hang un. Joshua a ompih Pasian in note hong nusia lodinghi. Esther Kumpinu mahbangin, “Hih bang hun adding Pasian in note ahong teel, ahong zat nahi uhhi”.(Esther 4:14). No angsung leh phung leh taang bek huailo aa, taangpi, taangta ahuai, ngainganzi tama(politician) ikisamhi. Hong pilvang, hong hangsan unla, hong huaisiam un. Mipite no lam ah hong pang uhhi.

5. Sumbawl Paaibawlte tung ah

Mizawng daaipaam tampite lak ah hauhna leh ankhing khamna zongin sukleto ah azin avaak sumbawl sipuazi-tama (Kawlpau) te aw,

Hong tuahpha unla, hong lawhcing un. Tomkha kal a hauhpak nading lunggulh in lamdawt tawh hauhna sum leh paai hong zong kha kei un. Mi’ nu, mi’ pa khitui luang in, mi’ tu, mi’-ta tuailai momno tampite dawn muih dingin sumlehpaai zongin, zuakna leina hong neikha kei un. Banghanghiam nacih uhleh,  tuabang aa lamdawt tawh sum zong aa ahaupakte in akhan uh khomlo uhhi. Aluangklhia mi’-nu, mi’-pate’ khitui in guu leh gau hong nei ding aa, na thuakkik teitei ding uhhi.

Khangthum, khangli kizom aa hauhsuak theih nadingin khua-ul suakin thumaan leh cihtakna tawh sum hong zong unla, hong zuak hong lei un. I minam leh igam ilei, hauhna manna tawh hong lamto unla, azawng daaipaamte hong laamsang un. I mipite in hong ngaaklah uhhi.

6. Zalian, zanei Kumpi uliante tung ah

Khatvei lai aa i-angtanpih leh gualtung vabang tuanpih in, ikhamuanpih galkap lam leh, civil lam ah, amunmun aa om kumpi nasem ul;ian khempeuh aw,

Khatvei lai aa i-angtanpih bang nawnlo in, ulian zanei ikiam duaiduai peuhtawh kibang ka kisahi. Hanlung ciam in minthan zakhan hong lawh unla, a mi zatam lak ah hong madawk un. Cihtak thumanna hong tuh unla, Jesu lampi tawn in mipi kal ah itna leh thumanna tawh, na hong sem un. Tuabek in kipna khona leh sang laptohna hong pia, hong tun dinghi.

Nasaanna pan un hong khiasuk nuam, hong haza gal tampi naneih lam uh hong mangngilh kei unla, neekna, dawnna, pauna, haamna leh gamtat luheek hong kidawmta un. Note banzom dingin leh no min, noza hoing zom dingin Zosuan tuailai khangno tampi hong pantah in, khang hong kibansam sak kei un. Note hong laamto Pasian khut mah in, na taal khaakloh nading un, hong lenkip tahen!

7. Lokho-singpuate tung ah

Tugaa, heigaa tawi in lokho singpua a igam, ilei apuah azuun lokho mi khempeuh aw,

Eden huan ah nasep cil in lokhawh mah ahihi. Nasep hoih hi, nasep maan hi. Vangneih angtan pihding nasep ahihi. Ahi zongin lungdamna Thu in hoing giahden zawh kum zakhat khit ban ah pu leh pate’ zat tu-tang khat mahtawh leitang gitgit-kuikui laiding ihihiam? Kumkhat tuuk khat veibek mah tung in, vaimiim, taang leh gaa te bekmah lala laiding ihihiam? Guahtui, hawktui in ileihoihteng hong nawk mangsak in, Kawlzang lam hong tutsak khinhi. Khaamsawm loding ihihiam?

Kum khat tuuk khatvei bek tung lo-in, atuuk akhaak in gah leh the, kiphamat sak den dihni. Ankhing kham nuam hihang. Khawhdan, eh-dan hong khel unla, atamtam, anemnem hongla unla,na saal uh leh na ciang na beem uh hong dimsak dih un. Leipan aa piang geh leh tehte bek ahilo, khawi leh vulh zong hong siam unla, igam, ilei ankhing khamna suah dihni. Pasian in tuabang Thupha eite tung ah hong pia nuamhi.

8. Zoliate tung ah

I innkuan sung, i9khuasung leh iPawlpi sung, igam ilei ah mimal tamzaw Zolia khempeuh aw,

Akhangkhang in ipu ipa ngeina (culture) leh iobiakna paaina(religion) nangawn ah, netniuamna, atthawlna nathuakna pan un suahtaak tumh iunla, tha hongsaan hong dingto un. Mun tuamtuam leh gam tuamtuam ah, khat vei lai aa Zosuan lia, ei bangmah aa, netniamna leh koihdakna athuakte, adawn dongin hong khangto in amunmun ah, gampi makai hong sem uhhi.

Tua bang mah in , no Zolia tengzong, khut kilen in, maa hong nawt dih un. Igam, ilei, iminam leh iPawlpi ah note adding mun kihawi laihi. Hih kum zapawi no lam ah a pan thei unla, kalnawh suan in hong luah meng unla, tua bang mun sang hong luah dih un.

9. Gamdang aa om Zosuan tate tung ah

Igam,ilei, iminamte leh etlawm mualkuam, Zogam nuam khengin vaihawm zo aa leitung bup atung Zosuan tate khempeuh aw,

Na tuntunna pan un, na ngai dih un! Kum za siim Thuzui mikhempeuh in, ibiak Topa Zeisu Khrih min tawh na khut uh hong len uhhi. Na tuntunna uh ah, hong lawhcing in, maa hong khuat in hong nuamsaa un.

Koilai, koilai ah na om uh zongin,  ibiak Pasian leh Ama’ hong bawl Zosuan tate nahih lam uh hong mangngilh peuhmah kei un. Na tuntunna gamnuam pan in, iZogampi hong phawk unla, khut kilen in puah khawm dihni. Hih mun pan in Thungetna tawh kum zakhat Thupha kong paih uhhi.

10. Kum zakhatcin pawisiimte tung ah

Khua tuamtuam leh Pawl tuiamtuam pan kum zakhatcin azo, asiim, Pasian Thuzui Zosuan tate pawi manta in khua leh tui ah kikikhen ciang, tung Pasian in, aPawlpi leh apiansaksa Zogam, Zolei, Zosuan puahding, zuunding kua dang muanglo, ei hong muang hi.

Pau leh haam tawh kikaak lo-in,upzia, zatzia pawlvai tawh zong kikhenlo aa, hong kibangsak thubul ahi, Zeisu itna leh, Pasian Thubul ahi Laisiangtho mah lenkhawm, tawikhawm, kilenkhawm in igam, ilei, ikiim, ipaam, iminam leh ilia, ipau lung kituak in puahkhawm zuun khawm ciatdih ve ni. Tua bang hileh izing vaihawm hong lawhcing ding aa, kum zacin khit, ihmailam zong, sun ni bangin hong taang dinghy.

Kum za cin pawipi hong siim, hong zo note tung leh leitungbup aa om Zosuan tate vannuai tung ah, kum zacin Thupha athak in hong tungin, leitung beidong hong om paisuak tahen! Amen.

Source by – ZOL

Posted by – Suumpy

Add your comment

Your email address will not be published.