NA NAMSAU A PAIAH SIATKIK IN – Robert.N.K Hau, Ngaizawl

Simon Piter in namsau kuah ahih manin a namsau dokin siampi lian penpaE silapa a sat leh a taklam bil a satkhia hi. Tua silapa min Malkhus ahi hi.L (Johan18:10). “Tua ciangin Jesu in ama kiangah, “Na namsau a paiah siat kik in. Namsau a zangte namsau mah tawh si ding hi. Ka Pa kiangah ngen hileng, vantung galkapte hon 12 val, thakhat thuin hong puak pah theih ding lamtak theilo na hi uh hiam?” (Matthai 26.52-53)

Hih thu pen Jesu sih ding kuan cianga Gethsmani huana thupiang ahi hi. A nungzuite in Jesu thungetsung zong ngak zo loin thumvei a ihmutsan khit uh ciangin “pai khia ni” ciin Jesu in a nungzuite phong a, tua laitakin lehhekpa Judas leh siampi honte hong tungin Jesu hong mat uh ciangin Simon Peter in Jesu a hut sawmna lamah Malkhus bil a satkhiatsakna ahi hi. A Lai Siangtho sung thu i theihtelsa ahih manin tam gen ka sawm kei a, ahi zongin hih thupiang tungtawnin ki-etphat a kisapna pawlkhat om thei dingin ka mu hi.Article

Khristian nuntakna-ahngaihsutna kibang lo leh ze-etna thuaklah i tam luat manin leitungah tupna leh ngimna kibang nei pawlpi tampi tak hong piang hi. Sih khit nunga kha nuntakna ding khualna tawh Jesu nung i zui uh a, Lai Siangtho kibang zangin, vangam tun sawm tekin i khuasa uh hi. Ahi zongin a khen in‘Jesu bek Pasian hi’ ci uh a, ‘Thum gawm Pasian’ a ci ki-omin, ‘Jesu kiangah i mawhna pulak leng, aman hongmaisak ding hi’ a ci a om laiin, mihing mah siampi za kiguanin, siampite mawhsutsak lo tawh alungkim zolo ki-om hi. Hihte pen kuamah kigensiat theih leh kimawhsak theih zong om tuan lo a, a kipatkhiatna bulpi penpen in ‘ze-etna thuakzawhlohna’ ahi hi.

Mi pawlkhatte’n Pasian hopihna a ngah uh tak ciangin, Pasian thupina dinga zang loin Pasian mangngilh bawlin amau minthanna dinga hong zat nop tak ciangin, tua ze-etna, satan lungsim lelh manin pawl tuam hong neiin Lai Siangtho a lumaletin hong hei uh a, sandan tuampi hong piangsak hi. Hihte khempeuh bang hangin hong piang hiam? Pasian in ‘Om kei hen’ ci peuhleh a bei ding hilel a, bang hangin hih bang koih a, a langpang dingin satan omsak se hiam? Amah a um-a a zui mite tungah amah a um takpi mah hiam cih sinna nei nuam ahih manin hih bangin a piangsak ahi hi. Matt.26.40-41 sungah,“Nai khat sung nangawn hong ngak zolo liang na hi uh hiam? Zeetnaah na puk khak lohna dingunthungen un. Lungsim in zeetna nang nuam napiin pumpi in nang zolo hi” ciin na gen hi.

Saptuamah i om kisam a, pawlpiahi om takciangin sep ding leh seploh ding tampi om hi. Khenkhatte in makai/hihna a let tak uh ciangin thuneihna ana khempeuh a nei khin kisain kuama thu ngai nawn loin vaihawm thei hi. A pil a siam pen kisain vai saiin, vaihawmpih upa leh siate tawh vaihawm tukhawm mah taleh ama thu bek sial sain khauh geugau thei uh a, mi khatpeuh ii cian piakna leh hanthotnateah ‘hi thei mah inteh’, cih lam leh kietphatnaa la loin ‘hong thusim lo hi’ ci-a a sia lama a lak ciangin pawlpi sungah meimatum piangsak thei hi. Tua bang lungsim pen a lang nih-a a hiam namsau tawh kibang thei hi.

Bek tham loin, pawlpi khantohna ding leh ngaihsutpi penin Pasian nei kha lo ahih manin, ama mimal lungkim lohnate a makaih tavuan neihna tawh thuk giihgeih thei uh a, pawlpi sung bektham loin, huang pualam ahi minam vai, khawsung leh veng sung ahi a, beh leh phung sung kimakaihzia nadongin ahi zongin mun khata a makaih sepna hangin a pil pen leh a siam pen kisa khain, ngalulok bangin kipek leklek kinken thei mawk uh hi. I kamsunga om i lei i kep zawh kei leh tua lei pen sihna gu zahin hatin, namsau zahin hiam thei mawk hi.

Pawlkhatte leuleu in pawlpi leh pawl khatpeuhpeuhah makaih tavuan a let loh tak uh ciangin midangte thanemsak leh minsiatsak dan ding bekbek ngaihsun uh a, thapiaka tawsawn lam sangin kosiatna tawh zawng­khalsak zaw thei gige hi. Tua zong namsau zaha hiam mah suak hi.

I naupan laiin i ututin gamtain, i ututin i kampau a, a sia leh a pha khentel masa loin i tuah thupeuhpeuhah i lungsim puakzia i genkhia ziauziau hi. Na i thuak hun ciangin kap-in, i khitui i phulsak pah thei a, a kap kimlai i kim i pamate’ thugen leh gamtatnate hangin nuiin, a nui leh a lungdam kimlai kammal nih/khat hangin hehin i maipuamkik thei hi. Hun paisa khempeuhah i gamtatnasate enkik hileng, naupang bangin i ututin gamtain i kampau hi. Upa/ makai hi napiin tua hihna zalian taktakte zahtak zoloin guihtheihkhamtheih tawh i kidiah a, utut genin, i awi loh khat peuh zahkoin,i awlloh khat peuh ekkha gimnamliangin i gensia hi. Advise (cianpiak) sang zoloin i kiliansak a, Pasian mai zong masa loin ivaihawmnaah Pasian i kihel khasak kei thei hi. Mimal kihuatna leh kilemlohna hangin pawlpi leh hiang khat peuhpeuh committee­na panin a thu gen hoih mah taleh (ama gen ahih manin) nial teitei i sawm thei uh hi. Tua pawl or pawlpi ii khantohna ding a masa penah i koih kha ngei kei hi.

Zomite pen muntuam gam tuamah sum zong pai zonga a zinsuk a zinto hi hang a, tua kawmkala, minam leh pawlpi kipawlkhopna leh malakna-ah gamgi i neihsak khak zel pen i picinlohna mahmah khat ahi hi. khuasuak, Saizang khuasuak, adg), No tua pau zangte (Teizang, Khuano, Saizang adg..)“ i kicihcih manin bang khantohna hong piang hiam? Hih in kikhenna lampi gol pen hizaw lel lo hiam? Pawlpi sung nalengah tuate hong maingal mahmah ta. Hihte khempeuh a gawmkhawm siamlo makai i hihkhak leh zong i kietphat kisam mahmah cihna hi. Tua thu hanga makaih nasep khawlsan ding cihna hilo hi. Picing hita hang a, tuate khempeuh a gawmkhawm thei leh a kisin dingin Pasian in nang hong deih ahih manin tuin hihte khempeuhah i kikhel hun ta hi.

Tuin khangcingin kum 25 bang pha ta hang a, zi leh pasal deih gual hi ta hi hang. I naupan laiin“Kawlte hiteh” hong kiciin, Kawl biakna leh Kawl namziate i zui ahi phial zongin, Kawlte i hihloh lam a kankhia thei ding khopin khangcing ta i hih manin i zuihsa lampi manlote lampi man tawh a khek thei ding hi ta hi hang. Zomi ahi i mipih tampite Mizo biakna sungah a lut uh hangin, vaihawmna leh holimna khatpeuhpeuhah kuamah in, “Hih pa amau pauin hopih kei leng hong lungkimlohsan khain teh” cih ngaihsutna tawh Zopau in hopih kha ngei beekbeek lo uh hi. I vaihawmna leh vai khat peuh­peuhah, “Pau dang zangte tasak kei ni” cihna hiloin, eipau mah i bulphuh kisam ta hi. Vatawt hon laka Ak khat hanga vatawt dangkhempeuh zong ak khuana a khuan uh a kisapna om lo hi. Nampizia lungsim zong i puak hun ta hi.

Hici cianga hong tonpiha hong kem i biak Pasian in minam dangte tawh hong bawl dan leh hong kepdan a kibang tek hi cih zong phawk hun ta hi. Kum cing khin ta hang a, thusia lasia, kisap neu khatpeuhpeuhah midang namdangte a puak dawkdawk kinken ding leh minam dangte a maivil/maietdawkdawk kinken ding hi nawn lo hi hang. Pasian in minam bangin i din ding hong deihlo hileh hongsumai-mang khin lua mahmah ding hi. Minam genloh, i pawlpi bang zong tuin kum 25 bang hongtonpih/makaih khin Pasian in deihna hong nei hi cih phawkin, Pasian in minam khat tekteka hongbawlpih minam dangte tawh liangko kikim, sep theih sep zah kikim dingin eimau khe tawh din i kisin zong hun mahmah ta hi. Ei leh ei a kisikzo i suak theihna dingin picing lungsim tak tawh i nuntak ding kisam ta hi.

Tuin kum 25 bang hi ta hang a, naupang melmawl i hi nawn kei hi. Picing khin i hih manin i lungsim puakziate i khel hun ta a, i gamtatte zong a kilaih hun ta hi. I naupan laia i zat lum leh hiamte i zat hongkilawm nawn lo a, a kilawm leh kilawm lo khentel thei ding khopin i kum zong hong tam ta hi. Makai i sepnaah zeetna, gensiatna leh awllohna, mite kosiat leh thuman lo pi-a mawhsakna (I Topa Jesu bangin) i thuak hun zong hong tung ding hi. “Zeetnaah na pukkhak lohna dingun thungen nuam napiin pumpi in nang zolo hi” cih Jesu kammalte mangngilh kei ni. Tua bang haksatna i tuaha thuhkik pah nopna lungsim lehhehna lungsim i neihte hangin a hiam mahmah i lei i pusuaksak kha thei zel hi. Na lei mahmah dawm inla, na namsau a paiah siat in.

Hong kimakaihnaah na lung a kim kei leh phun pah ken la, kamnemin gen in. Lungkimlohna na neih manin pawltai ding ngaihsun pah se kei in. Pawltai taite pawl dangten zong mi leh sa dingin lungsim takpi tawh iplah tuanlo hi cih phawk in. Makai kician lo leh bangmah theilo na tuahkhak niin lungkiain gense pah kei in. Pasian in banghangin hih bang makai kician lo a nei taak dingin hong mu lai hiam ciin Pasianlamah kiko zaw in. Tua banga heha thangpaihna pen a langniha hiam namsau tawh kibang a, mihoih kimlai misia suaksakin, mi cidam kimlai sihna gutui dawnsak bangin hing kiam thei hi.

Eimah bek i kingaihsut lai, i gamtatna khat peuhpeuh pha i sak lai, kuamah i thusim loh hun teen­age (kum 13-19) kheng ta i hih manin i naupan laia i zat i hiamte a paiah i siat kik hun ta hi. I naupan laiin hong kihilh tangthute a kipan i zak thu khat peuhpeuh dik hi ciin ngaihsunin i um pah a, i gamta pah lel hi. Mi khatpeuh thusia bawlna hanga zi leh pasal khen mai ding leh, pawlpi taisan pah utna lungsim nei gual hi nawn lo i hih manin picing gamtatin gamtain, zeetna a nawkzo-a a paltan ngam ding leh hun paisa a i zat lum leh tei, leh namsaute a paiah siat kik thei tek dingin eimau mahmah kisian­suah tawmin mapang khawm ni.

ZBYF Tangko Nov 3,2013

Add your comment

Your email address will not be published.