LUNGDAMBAWL THUPUAK

Lungdam bawl hun hong tun sim in, innkuan kim ciat ah lawpna le lungdam na om in, thu um mite ki kaikhawm in, hun nuam ih zat khop ding ki ngaklah mahmah hi. Tu zingsang ka thawhphet in Topa tungah thu nget na khat ka nei hi. Topa aw, tutung Lungdambawl tawh kisai nidang a ka zak ngeite leh ka hun zat ngeingeite a hi lo adang hong pia ve ci-in ka ngen a ka ngak pah hi. Topa in thu namnih ong mu sak thute  mipihte tungah gen khia pah ning ei ci-in lai kong khak pah hi. Ka koh masak pen ahih leh ka it ka pasal ahi hi.

Tu kum M.Div  class khat ah Thuciam Thak tawh kisai ka Sia pa in, ama laibu bawl tawh  kikup na khat ong neipih hi. Ka siapa min pen “Mark Allen Powell”a hi hi. Amah pen Lutheran pawlpi sungah mi theih mahmah khat hi in, laibu zong tampi at hi. Siapa laibu at khat pen, “Cashing The Eastern Star,” cih hi in New Testament II ah ka sin uh hi. Hih laibu laimai 157-184 dong, “Magi” cih kammal tawh kisai thu hi. Tedim Lai Siangtho ah nisuahna lam pan hong paite mipil ding leh misiam kumpi dingin kingaihsun tawntung hi. Ahih hangin hih laibu sungah “Migi” cihte pen sila hi in, kumpi inn-ah a tote-un a bawl siat theih zel te hi. Bangmah sinna theihna a nei lo a a hun uh a mawk bei sakte hi, ki ci mawk hi. Kei zong ka lungkim thei lo-in, “Sia aw na laibu in ka neu tung a kipan ka upna khat ong suksiat sak hi, hih laibu pen kei a dingin thupi lo hi,” ka ci hi. Siapa in,“No nisuah lamte in mipil ding kumpi ding in na um mah uh hi,” ci in hong dawng hi.xmas

Tua ka lungkim theih lohna pen tu zingsangin Topa in ong dawng ahih manin lungdam mahmah ing. Bangmi bangmi hi taleh sila ahi a, to ahi zongin Jesuh kiangah a pai uh ciangin, bia dinga a pai uh ciangin, mipil suah uh hi. Kumpi suah uh hi. Halehluijah! I Peter 2:9 “Ahi zongin note pen Pasian in a hong teelkhiat minam, Kumpi siampi pawl, a siangtho minam, Pasian’mite na hi uh a,khuamial sung panin a hong sam khiapa’ nasepna a lamdangte a genkhia dingin Pasian in a hong teel mite na hi uh hi,” na ci hi.

Thu nihna a hong lahkhiat pen, “Ni suahna lam” cih kammal khiatna ahi hi. Ni suak cih pen hun kipatna hi tawntung hi. Khua vot in khuahun a nop mahmah laitak hun hi. Mite zong zingtho in ih tha a dim hun ahi hi. Tu ni bang sem ding bang bawl ding ci-in ih kithawi hun ahi hi. Nisuah hun ih lap khak leh zekai cih om lo hi. Lisu minamte in nisuah hun ah a kongkhak teng uh hong khia in, maitaina tawh dawn uh a, nupa kitot khak ding pelh hamtang uh hi. Bang hang hiam cih leh thupha pen zingtungin vak kawikawi a, a maitai te inn sungah lut pah hi, ci-in (sia Pauneu gen ngei) ong ki gen ngei hi.

Topa ong piak thu nihte te tung pan: Topa Jesuh bia nuam a, a zuan khempeuh ih Topa in, mipil in siam hi. Kumpi nam in siam hi. Siampi nam in siam hi. Mi siangtho nam in siam hi. Damna pia hi. Hauhna pia hi. Khan sauna pia hi. Liim leh vaang pia hi. Leitungah bangbang a tuak zongin Topa sungah nuam sa ngiat hi. Jesuh tawh ih kipat nak leh nisuak hi tawntung a, zekai ngei lo hi. Tu ni-in Jesuh kiang ih zuat leh nisuak hi, mai lam ki mu khol thei hi. Nitum ding zong lauhuai nawn lo hi. Ih Topa bia dingin zuan ciat ni.

Pastor Don Ngaih Lian 12/06/13

no comment

Add your comment

Your email address will not be published.

%d bloggers like this: