LUNGDAMBAWL LEH MISTLETOE PAAK

Lungdambawl hun in biakinn leh innte zepna ah Holly paak  tawh a kizep khop loh a phamawh khat pen mistletoe paak ahi hi. Mistletoe paak i pianzia khat pen singkung dangte tawh kibang loin leilak pan a po namte hi lo hi, singkung dangte tungah a posawn, a pothuah nam hi. Singkung, singteh, leh suangteh pilna lam ten “parasitic” singnam in ciamteh uh hi. Singkung a teek pian leh a hawng a nip te tungah bawm nuam deuh hi. Zomi ten “Manghbawm, Manghkai,” ih cih te hi leh kilawm hi.

Lungdambawl’la a kisa te khat ah, “kissing under the mistletoe” “mistletoe kung nuai ah ih ki tawp pak” cih dan a hi tam maw? Mistletoe omna singkung nuai ah a ki mu kha, a ki tuak kha te pen ki kawi, ki tawp, ki nam hamtang ding uh hi, ki ci hi. A haksa pen thu khat ah, lawm leh gual a ki-it a ki ngaite a dingin a haksa thu ahih loh hangin, gal leh sa a, a ki neite a dingin thu haksapi khat suak hi. Banghanghiam cih leh ki “kiss” kul teitei ahih man ahi hi.

            Mistletoe paak pianzia pen Holly paak tawh a kibat lohna pawl khat om hi. Holly pen a teh khauhin a mongzum in hiam hi. Mistletoe pen a teh nip hi, hiangneu khat tungah a teh thum pha-in, a laizang a om pen mihing lutang dan-in beem pian in, a nawl a te nih pen mihing khut dan-in om a, khut nih laptoh tawh kibang hi. Khut nih laptoh pen kiniamkhiatna, ki apna (surrender) cih nopna hi. Gal simna ah ih gal ten a khut uh ong laptoh leh kikap thei nawn lo hi. Zomite ngeina khat-ah “Sutpom” cih kammal khat om hi. Ih galte ong pai in, inn sung a om, ih khuampi ong kawi uh leh tuapa pen “Sutpom” ki ci, a ma tungah bangmah thusia kibawl thei lo hi. Ki that thei lo cihna hi. Mistleto’a tehte kawm-ah Holly’ gah tawh a kibangte omhi, ahi hang mistletoe’gahte pen a mel kang hi. A kang mel pen ki itna, ki lemna (peace), ki thu tuahna lim ahi hi. Tanglai hun-in mistletoe pen zatui in kizang hi. Tangthu pawlkhat ah Topa Jesuh a ki khaina Singlamteh pen Mistletoe po-na singkung hi ki ci hi. Banghanghiam cih leh tua Jesuh pen mi kitawngte a ki lemsak’pa, van leh lei a ki nam sakpa, nisuahna leh nitumna a kinai sak pa ahi hi. Amah pen Kumpite Kumpipa, tote Topa, a Lamdang, Thulakpa, Vanglian Pasian, Tawntung Pa, Nopsakna Kumpi, ki ci hi (late 85:10-12, 103:12, Is 9:6).

            Ih leitung nuntakna zong mistletoe mah bangin a nungta Pasian singkung tungah a bawm pak (manghbawm) ih hi hi. Ih nuntak theih na dingin Pasian in ong vak, ong khoite hi hang. Ih nuntakna ah amah tawh ih kipelh khak leh ih nuntakna a keutum ding hi ta hi. Pasian’mistletoe nuai ah a nungta taktakte ih hih leh  khat leh khat ih kilem kul hi, ih ki niamkhiat kul hi, ei a ding bek hi lo mite a dingin zong ih nuntak kul hi. Lungdam!   Pastor Don Ngaih Lian

(Hih a tung a thute Tedim Lai Siangtho leh Internet pan ka lak hi)

no comment

Add your comment

Your email address will not be published.

%d bloggers like this: