Lungdambawl leh Holly paak

Kumsim lungdam bawl hun hong tun ciangin biakinn leh inn sung inn puate  zep ding a thupi pen in ki ngaihsun tek hi. Mikanggam deuhdeuh ah sum leh paai tampi bei in ki zeem hi. Hun khat lai-in a hoih theithei ding a a kizem lel ka sak leh na hi khin lo hi. A kizepna van leh a mel (color) te in a khiatna a neih ciat lam ka theih sawt nai lo hi. Gentehna khat bangah takkung a hing ki zang nuam hamtang hi, a deihna pen takkung pen vuukkiat hun nangawn in a tehte pulh lo a, hing sitset hi. Hih a hing sitset (evergreen) pen in Topa Jesuh hang a ih ngah nuntak tawntungna a gen nopna hi. Tua singkung tungah ih khai ding aksi a hih leh tampi kisam loin, aksi khat bek kisam hi. Topa khat bek i nei hi.

Holly paak ahih leh inn leh biakinn zepna ah ki hel kei leh a piang thei lo khat suak hi. Holly paak pen a kung bawk litliat a, sawlbawk kungnam hi in, a kung sang nam hi lo hi. A tehte hing sitset, khauh mahmah in, a teh mongte hiam leh ling bangin zum hi. Tua a zum ten ong dawt kha leh na thei mahmah hi. A gahte ahih leh bem tiltel, san sitset in a bawkbawk in gah uh hi. Phalbi hun in singkung dangte tawh kibang loin a hoih pen hun ahi hi.

Mipawl khatte in, gamlak a pai ding uh ciangin dawite tawh kituak kha leh ci-in a do sak dingin tua holly teh zumte a lutung uh ah suangin pai uh hi. Dawi biate in zong a inn sung uh ah dawite a lut ngam lohna dingin a kongbiang tunguh ah holly sawlbawk khai uh hi. Zomi ten zong dawi ih thoih ciangin zehtang ci-in a inn sung uh ah kuamah kuamah a lut theih lohna dingin a kongpi uh ah sawlbawk khai uh hi. Tua sawlbawk om pipi ih lut teitei leh a dawithoih na uh ah, a bei khempeuh ki liausak hi.

Thu um Tapidawte in zong a inn sung uh ah dawite a lut theih lohna ding holly sawlbawkte kongbiangah a khai zong om uh hi. Ahih hangin thu um tapidawte holly paak tawh kisai a deihna a bulpi pen in: A teh hing sitsette in Topa Jesuh hang a ih ngah nuntak tawntungna ahi hi. A teh hiamte leh ling bang a ong sun thei a tehmong zumte pen Topa Jesuh lutung a, a kiphut ling lukhu limlakna ahi hi. A singgah san sitsette pen ih Topa lutung pan hong luangkhia a taak keuhkeuh sisan malte muh sakna lim ahi hi (John 3:16).

Tu kum lungdambawl hun-ah kum dangte tawh ki bangsak loin Pasian thu-ah thuk lut deuh na dingin ka lungsim ka khensat hi. Lungdambawl tawh kisai tangthu leh thu tampi ih zaza ngei a, ih gengen ngei hi. Ahih hangin tua thute sungah bang zahin thuk lut in, ka nuntakpih hiam cih kei leh kei ka ki sittel ciangin, ka nuntakpihna tawm mahmah hi. Nun takpih lo ka hih manin mite a dingin ka khum zo kei a, ka al zo kei a, ka lim zo kei hi.Siamah Ngaih Lian

Ih Topa Jesuh linglukhu in ih nuntakna ah bangzahin man nei hiam? Tua sisan tak keuhkeuhte ngaihsut in ih nei kha ngei hiam? Nuntak tawntungna a cih in nang leh kei a dingin manpha takpi mah hiam? Topa Jesuh lo tawh kha galdona ki zo lo ding hi (II Thes 2:8).

(Hih ka-at thute Tedim Lai Siangtho leh Internet pan ka lak ahi hi).

Pastor Don Ngaih Lian

no comment

Add your comment

Your email address will not be published.

%d bloggers like this: