KUMTHAK LE NI SUAKTHAK

1993 kum bul kipat in ‘Piancilna’pan-in Lai Siangtho sim ka kipankik hi. Piancilna ka simsimna sung pan ka lungsim ong la mahmah Lai Siangtho mun nih ka mukha hi. Tuate pen Piancil 19:23 “tua lai-ah ni suak khin ta hi,” cih le Piancil 32:31 “Peniel a kantan laitakin ni hong suak hi,” cihte a hi hi. ‘Piancilna’ ah nisuak dang ka zonzon hangin ka mu kha nawn kei hi. A masa nisuahna thu tawh kisai pen Sodom leh Gomorrah khuapite kaattumna hi-in, a dang khat pen Jacob khe baina tawh kisai ahi hi. A masa zaw nisuahna pen mikang Lai Siangtho (KJV) ah “the sun was risen upon the earth,” le Jacob khe baina pen “the sun rose upon him” na kici hi.   Lot le a innkuan pihte Zoar khua ah a lut uh ciangin “leitung ah nitaang hi” ci-in, Jacob a khebai kawm-in Penial a kantan ciangin ama tungah nitang hi.

Topa Pasian in Sodom leh Gomorrah khuapite a siat ding thu Abraham kiangah gen khol hi. Abraham in ahih theih zahin Pasian tungah thumthumsak hi. A tawpna ah hih khuapite kihal veve hi. Bang hanghiam cih leh Pasian a-um mi siangtho sawm om zo lo hi. Tua khuapite nih a kihal ciangin a kiangah om khuaneute zong a kangmang ding hi ta hi. Zoar khuaneu zong kihel hi. Lot nawh tai zo nawn lo ahih manin hih khua-ah ong lutsak in, ci-in ngen hi. Pasian thu-um mi innkuan khat tua Zoar khua ah a lut ciangin Pasian in tua khua hal nawn lo hi. Zoar khuamite in tua ni-in nisuak a mu ding uh hi nawn lo hi. Tua ahih manin tua ni a nisuak pen Zoar khuamite  a ding ahi hi. Lot lungkia lo a, a cih teiteina hang ahi hi.kumthak

Jacob a mah bek a om hun zan hun-in zan thapai Topa tawh kibuan hi. “Zan hun ih cih pen haksat hun hi. A kibuan tegel zong kuhkal mahmah uh hi. Ih nuntak hunsung khempeuh Pasian in ong buan nuam den hi. Haksatna tampi a nawkte zattaak pan hi, Topa in Jacob lawng hi, Pasian a zo pa pen Jacob ahi hi. Topa in a min laihsak hi (Is 62:2). Topa in a lawn lam Jacob in thei hi. Pasian’ khutma a tungah om hi. Pasian in a lawn lam zong mite theih ding deih hi. Jacob a khe bai hi. A bai lo mi zattaak lo, zuihtaak lo hi. Khelang khat bek tawh na mahmah ding hi na-pi Jacob in khah tuan lo hi. Khah lo ahih manin Pasian buai zo ta hi. Jacob cihtakna in a nuntakna ki khel sak hi. Kilamdang sak hi. Khe baina pen seel theih loh hi. Pasian pen Jacob’Pasian ahih ding maizum lo hi. Pasian in tua mun-ah Jacob thupha pia hi. Thupha ih cih pen van leh nate hi lo in, amah Pasian mahmah ahi hi,” (Baikawm makai by JM paupu). Tua ni nisuak pen Jacob adingin Pasian in atuam vilvel (special) in a bawl kici thei hi. Zan khat a lungkiat lohna, a cihtak manin tu ni dongin a thupha kizom suak hi.

            2014 kumthak ong tung hi ta hi. Lot innkuante bangin ni suakthak ah midangte ading thupha nisuaksak ni. Jacob bangin ei mah le i innkuante adingin thupha hi ciat ni. Ei le i innkuan sungah nitangsak ciat ni.

Pastor Don Ngaih Lian  25th Dec 2013

Add your comment

Your email address will not be published.