“Ka zozo hi-Ka semkhin zo hi”

Zeisu in singlamteh tungah “It is finished or accomplished/ Ka zozo hi-Ka semkhin zo hi” ci-in kiko hi. Bang hang hiam cih leh…

1) Pasian’ deihna tangtung sak hi. Adam leh Eve mawhna hangin leitung mite khempeuh mimawh leh asi ding ihi hi. Ei mawhna (Adam mawhna loin i bawl mawhna) leh gupkhiatna thudonlohna (ignorance) hangin zong sihna dan tuak dingte ihi hi. Tua hangin Pasian mahmah in atapa Zeisu eite tang dingin (substitution) mawh nei kilkel lo pi penalty dingin Singlamteh tungah atapa hong pia hi. Lai Siangtho Lui sunga thute tangtun nading leh Pasian’ hehpihna kilangsak dingin Zeisu in Pa’ deihna mangin ama sisian hong buakhia hi.

2) Zeisu in ama mission nasepna tangtung sak hi. Pasian hi napi mihing in hong piang a, a lipkhaphuai mahmah mi gilote bek kithahna Singlamteh tungah linglukhu (Judah Kumpi cih zahpihna) khu kawm sa leh puansilh lo zumhuaina thuakin eite adingin hong si hi. Vantungmi galkap tul 10 bang sam hen la, amah abawl siate dokik leh kingah lua hi. Cil kiphih, khut le khete ah siktukilh tawh kikilhcip in satnenna thuak hi. Lungleng khuangai in “Pa aw bang dingin hong taksan na hiam” (Eli Eli Lama Sabachthani-Aramiac kampau) ci-in kiko hi. Gathsemane huan sungah zong, “Pa aw, ahih theih leh hih hai tawh hong kipelh sak in,” ci-in khua-ul pen sisan luang bangin luangin thungen ngeungeu hi. Sih ding thei gige sa hita mah leh ama mission nasepna thumang takin tangtung sak veve hi.

3) Amah a um khempeuh ading tawntung nuntakna leh leitung vantung thupha kipatna lampi sial hi. Zeisu a um khempeuh in tawntung nuntakna ngah hi. I gamtatna pha, pilna siamna, hauhna, leh insurance-te in tawntung nuntakna leizo lo leh pia zo lo hi. Biakna leh ngeinate in zong pia zo lo hi. Zeisu upna bekin vantung gam hong tungsak hi. Zeisu loin gupkhiatna ngah nading lampi om lo hi.

I nuntakna sungah Pasian’ deihna bangin nungta in i tangtung sak hiam? Zeisu bangin bang mission nasep i tangtung sak hiam? Ei nuntakna hangin bang phatuamna mite in ngah hiam cih thu 3 tawh nungta dingin hong zawn leh kong phawk sak kikkik hi. US or gam 3na ciang tun’tawh lungkim ding hizaw loin hih thu 3 tawh koikoi ah na om zongin a nungta ding leh Pasian’ gam mitsuan kim dingin Topa’n thupha hong pia kim ciat ta hen, Amen!

Source:Zam Piang FB

Add your comment

Your email address will not be published.