|
News
|
|
Written by Admin
|
|
Sunday, 15 January 2012 21:15 |
|
Tua Christmas kumthak sung EURO sung eimi te omna gam pawlkhat ah Gospel paina Tha ngah Huaina ong hawmsawn ing.
Germany ah 23 December 2011 ni in London UK pan Sia Paul Thangpi te inn tung in nuamtak ongvai dawn ongmuak uh a amau inn ka taam sungteng German an limpen te tawh ongvaak uhi. Azing ciang Pa Paupi te Christmas Frankfurt a Zomi ahithei teng sam in vaak ngiat uha biakpiak kikhopna zong December 24/25 sungteng noptak ka nei uhi. Biakpiakna sung ah KhaSiangTho in na sem in Zeisu Gumpa Honpa in saang a Gupna ngah kiap thak mi nih leh thum bang om in tualo Kha lam ah bah kisa nungtolh leh teep leh muam neek leh dawn te ah KhaSiangTho panpihna tawh ki kheengzo nuam a ki-ap zong nih leh thum mah om in Biakpiakna nuam kasa mahmah uhi.
December 26 ni in Frakfurt mah ah Karen Christmas leh kumthak muakna kithuah pawi ah zong Sia Paul Thangpi leh Germany Zomi Innkuan Secretary Tg Suanno leh Sia Thangpi nau Tg Hau Kim tawh ka siim uh a, music amau teng in buplaak lian uhin Zomi te mi namdangte lak ahzong tumsiamna music tawh Topa'n Ong tawisaang ci in ka mu a ka angtang mahmah hi.
Azingteh Sia Thangpi in Frankfurt khuapi sung muhnop huai thupi diakteng ong vaakpih in German mi te 1848 kum in German gam khat in dingni ci a kikupna leh constitution bawlna St Paul Biakinn pi hong etpih a leitung gamhau pen lina a om German mite zong hihbang gam thupi asuah nading un Biakinn mahpan kipan maw cih leh sawtnai hetlo kumza val deuhpan a kipan deihtak ong kipat uh tun gam thupi leh ahaupen lina bang a omzo cih ka muhteh ih Tapidaw biakna leh Pawlpi ii manphat thupi diakna ka mu a tha kangah mahmah hi. Zomi te zong tu a kipan ih Tapidaw Pawlpi tungtawn in deihtak kipanpha in taii leeng hih kum zakhat Tapidaw biakna ih biakzawh kum zanih lom sung ah lamdang tak thu hoih thupha Pasian lapsaangna ih ngahsemsem lua ding cih ka lungsim sung a hong om in hih German mite gamlamna zong Tapidaw Pawlpi pan kipna khia ahihna etteh huai kasa mahmah hi.
December 28 ni in Germany Zomi Seceretary Suanno in Pasian a itna tawh kei leh Sia Paul Thangpi an limtak tawh Pasian itna azahtaakna latsakna in ongvaak a limtak thupha ngetsak in nuikawm ziahziah sa in ka kikhen uhi. Azingteh December 29 ni in nopsa lai taleeng ih mipih dangte kiang ahzong vapha a kimuhding lunggulh ka hihman in Frankfurt pan Hamburg khuapi ah Sia Paul Thangpi tawh ka pai uha meeileeng saap akisam teng Siapa in Ongsik bekhilo Pasian leh minam ait na tawh Hamburg ciang hong makaih in lampi ahzong ih minam leh Tapidaw Pawlpi thupi na hih Tapidaw Pawlpi ihcih in Pawlpi khatbekzong hilo minam buup gambup nangawn Asiam khangto sak thupha ngahsak hitaktak mawk ei, biaktaak tak ei ih Pasian ci in ciim theilo liang in ka holim uhi. Ni khat sung kipai hinapi in sawtlo khat sung tungpah tawh ka kibang uh a Hamburg ah David Thang Mauvom khua veng inn ah zintung in nuam kasa mahmah uhi. Pa Thang David Thangzong Saangmaang te pattahna sungah na khangkhia ngei mipil khat na hi-a minam it in tutak bang Zomi te ading Dictionary hoihtak khat abawl azawh khit edit laitak hi a tuate onglah teh thupi ka sakna khang hi. Kumtam phialta hitaleh minam ading cihtaktak nasem tinten khat ahihna ka mu a a dictionary bawl zong kician mahmah in appendix cihte leh theihhuai zattawm kisam phadiak te tawh thuah in tun abusuah publish dingbek azonzon laitak ahihi. Ongzawh ding ngaklah huai hi. Adiakdiak in gamdang tungsa Zomite ading in ih kidot mun tampi te tua sungah om kimphial ding in ka um a ong busuah ding ngaklah huai kasa mahmah hi. Gam kizop kihona phone code ci te a kipan hoihtak ong thuah in ong busuah mengmeng o Pa Thang nahoih sem in hun zangsiam mipa mithupi mahmah hi ciai ci in tha ka pia hi.
Azingteh nungkum sawtnai lo a hong nusia Pa Tawkpi tanu ami siangtho min Helena in Hamburg a eimi te omna inn teng leh khuasung teng ah hong vaakpih kawikawi in thupi kasa mahma hi. Khuavot lak ah Pasian aitna tawh hicibang hun ongpiak thupi sa ngiat ungh. Zahtaak huai mahmah hi. Eimi teng inn ah ka hawhna uh a Pa Salai Kipp te inn ah hawh in sun aan ongvak uh a tua khitteh tawlkhat holimna ka nei uhi. Pa Salai Kipp tawh holimna ah ko gamleh minam makai te no Pasian nasem te thupha piaksakna thupha ngetsakna lo in bangmah taangtung theilo ding hi ung. Tua ahih man in youtupe ah Pastor te thugen pen na en na ngai in Pasian kisapna phawk sansan ung. Gentehna in Dr Rev JM Paupu in "no minam leh gam a ding nasem te hoihtak na ongmian/success nop uhleh tua Gam neipa Pasian kiang ah ngen photding"ong cihbang ka saangthei mahmah thupi kasa mahmah hi ci in onggen in amau gamvai minam vai makaihna meeting te ah zong huntawp teh ki itna leh ki pumkhatna tawh nasem ih Pasian ih minam ading nasem ni cih in khitui luang liang a kiapna ka nei uh cihte hong gen a gam makai te sung ahzong Pasian ompihna teci ih mu thei a Pasian nasepdaan lamdang kasa mahmah uhi.
Tawlkhat holim khitteh thungetna nei in tua khitteh Dr Vumson zom ah ei Zomi te koiteng ah om in koici kikhuasak cih agelh lai tak minam ait mahmah Pa Thang Zam Dal te inn ah hawh in azi Shan te Tapidaw thu um mahmah khat hi-in thunop theih peuhmah uhi. Thungetna ka neihkhit uhciang in nu Dim Hamburg khuasung ong vaakpih Helena' nu ten nitaak an limtak tawh ongvaak in tua khitciang amau khua a om kawlgam pan Tapidaw ahi thei teng tawh Biakpiakna noptak ka zangh thei uh a, tua teng pen Sia Ciin Sian Khai in Hamburg University ah PhD saangzop kawm ana makaih hih in na nop peuhmah uhi. Koikoi ah Pasian in ka thupiakte na zuih uhleh no te abul lam in kong koih ding cih (Thkn28) sung a Topa thupha kamciam ka phawk velval ah koi koi ah ei hihtheihna hilo in Topa ih itna ih biaknopna lungsim in Pasian lung hong tuaksak a namdang te lak nangawn a abul lam Tapidaw Biakna leh Pawlpi thu ah aphung pi in Pasian in Ong siam ta taktak veh e ci in Topa Ong laptohna thupha ka lungsim in ka simphapha hi. Tulaitak ei Zomi te dinmunh ihhihna zah nangawn sang in asang zaw in koikoi ah Topa Apawlpi a ding in Ong zanghnuam peuh mah veh e ci in tua Kha thupha ka mu a, tha ngah huai mahmah leh Pasian tung ah cihtak in Ana septak taktak ei cih ka mu thak hi. Nitaak kikhop khit ciang in Pa Thang David Thang te giak in azing teh Sia Paul Thangpi in zingsang in a tenna Frankfurt ah hong ciahsan tuaituai in kei Danish gam a Zomi pihte kiang ah ka pai a Salai Kipp te nu pa in Pasian azah taakna uh tawh meileng lampi khialh theihnanding ciang itna tawh ongkha in lungmuangtak in ka pai hi.
Lampi ah ka pai kawm ka muhthak thu leh Zomi te ading inzong kizangh thei ding leh zangh thei leng ahoih mahmah ding ka muh ah Germany mi ten nuclear ihcih ni kuma Japan te buaina azat te pawl uh ana zangh uh hi-a tua hoihsa lo in akhek na ding in Solar system leh hiuhtha tawh meei lakna athu atheory bek a na mu leh gelgel bek hilo in German leh Danish gam kikal zaangtam teng ah solar leh huihtha lakna pangka-khat teh million khat bang man acih koih zihziah mawk uhi. Solar Ni pan thalakna te bang zaanglo taam tung ah koih zihziah uh a, ei lam hileh acing ding mi tampi kiseh kul ding a maw ci in mipil gam te nuntak hoihzia te leh etteh huai pilna te ka muhteh ei Zomi te ading inzong hih century thak ah tua system zangh thei leng hoihlua ding ci in Zogam Zomi te a ding ka thupha lunggulhsak deihsakna ongkhang sak mahmah hi.
Danish gam a Zompih te tawh kimuhna Biakpiak khopna leh tha ngahhuaina te azom ah ong gelh kik ning.
Pasian leh Zompih te itna tawh,
Sia Zam Pau
Tutak London, UK
|
Phone: 918-286 8673,918-286 8736
To know more about our service timeing and place please click here for detail.
