|
Dear Khazih sungah U leh Nau a kua mah peuh,
A beisa i muhsa, i zaksa thute tawh ki zui in Tulsa, OK khua leh mundang te ah Thungen pawl te' makaih na tawh Pasian' nasepna tampi tak i muh nate hangin Pasian tungah lungdam ko in, Ama Min i phat masa hi.
Hih Thungen pawl ci in (Khan International Intercession Ministries) pen Siamah Nu Khan makai in, a thunget khoppih tampi te lak ah, phualkhat a om khawm, a kimuh pih, thunget pih mun zaw deuh mi 5 khawng tawh Pasian' sawl, thupiak, lah bangbang in a kisem khawm a hihi. Hi tengah Thungen pawl bek in sem cihna hi lo in, a kikum khawm masa cihna bek hi a, mihing mitmuh ah a mapang te ahih leh, Thu-um mipi nang leh kei, pawlpi sia/siamah, pawlpi makai te leh a kiphal peuh peuh i piak khiatna, sepkhiatna ahi hi.
Hih thungen pawl pen Siamah Nu Khan (Niang Khan Ciin) kum 2009 bei December 11, ni-in USA hong zawh kum 2010 pan in USA gamsung a ding a kipan khia ahihi. Thunget (Taangmi thunget) ahih leh a kipat khiat zawh sawt mahmah kha ding hi.
Kum 2010 sung a kimu khia thei nasep nate:
1. March 30 pan April 8 dong Tulsa pan mi 8 White House lam manawh in kipai a, State tuamtuam pan zong Thu-um mi, sia/siamah te hong pai khawm in ni 3 sung gam, minam khempeuh a ding ANTAN THUNGET na a ki neih khit ciang Whilte House, Capitol Hills leh New York a UNO zumpi te, Ground Zero te ah pai in Thungetna ki nei hi.
2. September 8 pan 13 Tulsa mahpan in mi 9 DC lam ah ki pai leuleu a, State dangpan hong pai te tawh ni 3 antan thunget khit ciangin White House, Capitol Hills leh New York ah zankhat taam in UN zum ah thungetna ki nei kik hi.
Kum 2011 sung kalsuan na te
1. January 8 pan 13 dong Southern Hilton Hotel sap in Tulsa Khuasung Thu-um mite tawn ni 3 sung Antan thunget na ki nei hi.
2. March 16 pan 20 sungteng "YOUTH FOR CHRIST" thulu (Thuhilhsia 12:1) tawh Khangno te lainat na tawh sunsung Tintan, nitak sim Revival Crusade ki nei a, Special speaker ding Dr. Van Ram Oke (Yangon) kisam hi. Kha Siangtho in mitam pi te sunglam damna hong pia hi.
3. July 6 pan 9 sungteng "TUU CING HOIH PA' CIALPI" (John 10:10) thulu tawh sunsung tintan, nitak sim Revival Service kinei a, Speaker dingin Rev. Peter Lilian kisam hi. Tulsa Southern HIlton Hotel mah ki zangh hi.
4. Tua Crusade te gah ahi Khan' lawhna hangin a zawdeuh in Khangno te (pawl kidendan lo) in nipi zawh ninih ni sim (every Tuesday) nital nai 7:30pm in Hilton Hotel 2nd Floor, Wachita Room ah Leitung gam tuamtuam, migam tuamtuam leh kha mangtang te' a ding thunget khop na ki nei den hi. Tu ni dong ciang kizom to lai hi.
5. Tua thunget na (Hilton Hotel) ah hong kihel te sungpan khangno mi 36 te July 18 pan 25 sung "THE SOLDIERS OF JESUS CHRIST" (2Tim 2:3; 1Sam 17:47) bulphuh in Washington DC ah Crusade bawl ding leh White HOuse, Capitol Hills, New York UN te ah thungen dingin kipai khia hi. Speaker ding Rev. David Lah kisam a, a innkuan hong hong pai uh hi.
6. September 7 pan 12 sungteng Special tak in NEW YORK bulphuh in NI 3 ANTAN THUNGET LEH A DANG THUNGET nate nei kawikawi dingin Tulsa pan mi 9 kipai leuleu a, Yangon pan in Rev. A Sein leh azi Siamh Peggy te Siamah Nu Khan tawh kithuah in hong makaih thei uh hi. Mundang Mary Land, Atlanta, South Carolina leh Indianna te pan zong hong kihel thei uh hi.
Ni New York khua a ding ni 3 antan thunget man zawh ciangin New York khuasung teng tuilam (tembaw) tawh nai 3 kimvel in thungetna leh sathau leh ci tawh siansuah na ki nei hi. Tua zawh ciangin leilam ah khetawh pai ngiat in New York Stock Exchange zumpi leh, Bull image (Bawnglim kibawl) gei ah thunget siansuah in pai leuleu hi. A nitawp ni in Huihlam pan siansuahna Hilicopter 2 kikawm in mi 6 ta tuangin minutes 12 sung New York khuatungah leeng in Kha Khan' lawhna a dal huihlak kisian suah hi. UNO zum sung leh nitak in New York Time Square te ah pai in thunget na ki nei hi.
7. October 9, 2011 Ni Nitak in Tulsa khuasunga om Pasian nasem ngei, Asem laitak sia/siamah 48 te pahtawina Hilton Hotel ah ki nei thei hi. Tua tak ah Rev. Pau Khan Khai Kawlgam pan hong kihel thei ahih man in Hanthot na hun ki pia hi.
8. November 21 pan 27 sungteng "PASIAN KONGPI AH LUT IN LUNGDAM KOHNA KIKHOP PI" (2Cor 2:14)Topa' tungah lungdam kohna lianpi ki nei a, November 24 Thanksgiving ni in Tulsa khuazang bup Lungdam na Ankuang ki uum khawm hi. Hih tak in Keel 10, Vok 10 leh Bawng luang 3 kigo a, Sa kikham lua kisa in val zihziah lai hi. Sunsung khempeuh tintan kinei in nitak sim in Khan' lawhna hun nasia tak in ki nei hi. Special Speaker te in: Rev. David Lah leh Rev. Dr. Gin Khan Khual te hi uh a, Topa'n lamdang tak in hong zatsak hi.
Kum 2012 sung Maban i neih te:
1. March 22 pan 24 ciang Antan Thungetna, State dangpan zong hong pai in Tulsa Khuapi ah ki nei ding hi. 2Khang 7:14. Hih sungah i mai lam makai piding ahi Khangno a ding special thunget sak na ki nei in, pupa khangpan hong pai hamsiatna pan suahsak na ding thunget sak na ki nei ding hi. Yangon pan Rev. A Sein leh Siamah Peggy te nupa hong pai ding uh hi.
2. August 1 pan 4 dong Tulsa Khuapi sung mah ah Nupa Thusin na kinei ding hi. Innkuan sung nupa kikal nuam semsem leh, innkuan nuam semsem dinga, i pawlpi te nuam in, i gam zong hong nuam semsem ding hi. Tua sungah nu le pa te'n tate thupha piak na zong om ding hi. (Hih hunsung in nu leh pa te suakta tak in aki hel theih na ding in nau kem thei ding khangno nungak te volunteer kisam hi. Nang zong Topa' nasep ding mun hong kihon sak hi) Rev. Dr. Gin Khan Khual te nupa hong pai ding uh hi.
3. November 20 pan 25 ciang Tulsa Khuapi sung mah ah Thusin na leh Crusade om kik ding hi. Sunsung in Tintan om dinga, nitak sim in Revival Crusade om den ding hi. Hih hun a ding Yangon pan Sia Khup leh Sia Khai (Sport Ministries) te hong pai ding uh hi. Pasian mizat mahmah speaker khat zong ki sam lai ding hi.
Tua ahih man in na Calender uh ah na ciamteh unla, Tu a kipan Thungetna, piakkhiat na tuamtuam te tawh Pasian' gam leh lei a dingin hun i neih lai in mapang khawm ciat ding hong zawn pah uh hi.
Topa' Leenggah Huan Sungah,
Khan International Intercession Ministries
|
Phone: 918-286 8673,918-286 8736
To know more about our service timeing and place please click here for detail.
