|
GZA Khawmpi nithum ni zingsang kikupna ah Singapore panin hong ciah Sia Hang Khan Lian in hun kemin Dr. Chin Do Kham in “Zomi Diaspora” cih thu lu tawh hong kuppih hi. Zomite ih kithehthangna hangin ih tuah khak hatsatna tuamtuam leh a dah huai thute hong pulak ciangin kivei mahmah ciat ahih manin khitui mualtuang gilgialin ki om ciat hi. Tua bangin mipi laidipnemin a om laitakin kithehthangna hangin ih ngah hamphatna ih tate mangvom mangkangte sangin a pilzawkna, pahtawina tuamtuam ih ngahnate hong gen leuleu ciangin ki angtang lua mahmah a, Zogam ah ih kituah kik ding kal kingaklah mahmah ciat hi. Dr. Chin Do Kham in ama gen ding teng a zawh ciangin ama genna tungtawnin thu kikupna kinei a, pawlkhat bangin tha ngah lua-in tawp thei nawn lo liang uh hi.
Tua khit ciangin Dr. Man Hau Cing makaihna tawh Committee 5 te thusunna kineisak a, tu laitak Zomite dinmun, banghangin niam, bangcih leng khangto ding, cih amau muh dan ciat hong gen uh a, tha kingah mahmah hi. Amau thusunna a man ciangin mipi lam pan kikupna hi a, Zomi leh Zogam kivei mahmah ciat ahih manin thu gen ding bang kituh lamlam kha phial mawk a, thulu tawh kimemat kha lo dong a gen kha bang ki om liang hi. Tua khit ciangin Niangtui dawnna hun hong tung a, niangtui dawn kawm nangawnin GZA khawmpi manpha lua hi, ci in khat leh khat kikum litlit kawikawi in ki om hi.
Hun kipat kik ciangin Zogam leh Zomi a it mahmah khat ahi, Pa Gin Kam Lian thugenna hun khat kipia a, itna deihsakna tawh makaite mipite maitang zahtak om tuan loin hong hanthawnin hong tai a, vei lua ahih manin tawp thei pak nawn lo phial hi. Tua khit ciangin Rev. Go Cin Laang makaihna tawh Committee 5 te thu sunna leh kikupna hi leuleu a, amasa mah bangin Zomi leh Zogam ading deihsakna tawh kikum ciat hi. Zing an ne in tawl khat kikhawl phot hi.
Nitak lam kipat kik ciangin “Kalaymyo gam huam palik (police) lian pen pa in khamtheih guihtheih abei nadingin Biakna makai teng tha hong cial nuam ing” ci ahih manin hun khat kizangsak a, tha ngah lua ahih manin Pasian thu bang hong gen kha zawzen hi. Ama thu gen khat in ih lungsim hong sukha hi. “Galkap sungah ka sep lai in Zomi ka kithuahpih peuhpeuh galhang in citak mahmah uh hi. Ahih hangin palik mangpi hihna tawh Kalaymyo kong tun ciangin ih tha hong khek ding Zomi khangnote in khamtheih guihtheih a zat mawk pen na sa mahmah ing” ci hi.
Tua khit ciangin Financial Committeete hun kipia a, Global Zomi Alliance fund ding upna kamciam lakna hong nei uh a, Rev. Pau Khan Khai in hong makaih hi. Zomi leh Zogam adingin tha kisan nuam mahmah ciat ahih manin upna kamciam Ks. 150,000,000 (Tengh tul leh zanga) kim ki ngah hi. Kamciam pia nuam om lai napi-in an nek hun lua ahih manin kikhawl phot hi. Zingciangin piakkhiatna hun om lai ding hi.
Thu tangko,
Media & Communication Committee
|
Phone: 918-286 8673,918-286 8736
To know more about our service timeing and place please click here for detail.
