BANGHANG IN PASIAN IN IH LUNGSIM KI TAMZAN DING HONG PHAL HIAM.

Ih Christian nuntak na sungah Lungsim ki tapzan na om lo in picin na dinmun ah ki tung thei lo hi. Genteh na in, aktui  pen hi ci bang in tawi leng et lawm mah mah in, a hi zong in a nung ta akno khat hong piankhiat  na ding in a pi in ni 21 vaal a op khit ciang in,a hawng hong ki tap khap kul masa hi. Hi lungsim ki tapkhap na tawh ki sai in Topa deih na bang hiam cih, ih lung ngaih khop ding in kong zawn hi.

Late 34:18,  Lungsim ki tamzan te kiangah,Topa om a,Lungsim zanngawp te hon hi.

 1. Hong it luat man hi.-

eg.    Ka tanu uh Saan pi , kum 15 a phak in us ah sang kah  ding in pai nuam lua in, ni 10 an tang in thu a nget khit teh, visa a siauh leh ngah  vet  lo in a lung sim ki tam zan in ni 3 bang an ne lo in tho zo lo zah in a lung sim ki tam zan hi. Topa deih na a hang tel zo pak lo in kha sia pian hi.Tua hun lai in a pai thei bang hi leh ei mi te om nai het lo na mun ah,ih ngei na ki bang lo mang kangte inn ah vaom ding a, mi nuntak khua heek zia tel  zo lo in lungkia in matun zo lo in, hong ciah kik ding cih Topa in mukhol a hih man in visa a ngah sak nai lo na hi zaw hi.

2. Hong muan man hi.2

eg.  Job 2:6 –Topa in satan kiangah,en in na khut sungah amah kongaap hi,ahi zongin,amah sisak kei in a ci hi. Job nun tak na ah Topa in ze-et na a thuak zo ding in, muang a hih man in,hak sat na tam pi te thuak in a ki tamzan nun tak na te sin sak hi cih ki mu thei hi.

3. Nopsak na kuam pan in paikhiat ding hong deih hi.

eg. Joseph bang a pa ih it tuam ta pa hi in, a pa inn ah om den leh cih mah hun a, a mang tang tung ngei lo ding a hih man in a inn pan in lungsim ki tap zan na din mun te ah pai pih hi. Lam khat ah, gen leng  nopsak na kuam ih cih pen bang hiam cih leh, a nuam sa lu azong hi khol lo,nun tak zia haksa mah mah na pi in nuam  sa pong lel in kalthak suan nuam lo a om tentan na din mun  cih nop na hi a, tua pan in ih paikhiat ding hong deih hi.

4. Mihing { Leivui } ih hih lam hong phawk sak nuam hi.

eg. Computer leh mi hing bang ki lam dang hiam cih thu dot na khat om a, mi hing in thu ih dot teh  hong dawng thei a computer in zong thu ih dot te hong dawng thei hi. A hi zong in mi hing  in, kha sia thei ,kap thei a computer in,kha sia in kap thei lo hi,tua mun ah ki lam dang hi. Ih kah thei ciang in ei pen set vanh hi lo leivui a hong ki bawl mi hing ih hih lam hong phawk sak,a ki phatsak na ding pan in hong khaam a Pasian din mun a ih om khak lo na ding hong hilh hi.

5. Ih hih napeuh ah limtak in  hih ding hong deih hi.

eg.  Piancil 4:7,-Limtak in hih le cin,nang hong ki sang lo ding hiam?  Hi lai mun ih sim ciang in, na khat peuh ih sep na mun ah cihtak na Topa in hong kalh hi,cih ki mu thei hi. Cain leh Abel in biak piak na luikhawm in Cain biak piak na pen ki sang lo ci hi. A saan loh na ahang pen bang mah dang zong ki ci lo in, limtak in hih le cin nang hong ki sang lo ding hiam? ci bek hi. Ih nun tak na ah na khat peuh limtak in ci tak in ih hih lo man in, ih mai zum na, ih lung sim ki tap zan  na ih thuakna tamvei pi om khin tek in ka um hi. Topa in ih biak piak na te hong saan nop luat man a hi te hong sinsak hi zaw dingin ka um  hi.

6. A mah tawh ih ki holim ding hong deih hi.

eg. 1Samual 1:18, Tuaciang in numei in,nangma mit ah na na seem nu maipha hong musak in a ci hi. Tu ni in christian tam pi te in thu ngen zo lo in ih om hiam? Lungsim ki tap zan na ih tuak ma in Topa tawh ki ho lim ding ih ki sin ding thu pi mah mah hi.Thu nget na ding hun nei keng na ci kha hiam,hong gen ning thu nget na ding in,hun vaal ki sam lo hi, ih om omna -ah ih  lung sim sungah thu ki ngen thei hi cih phawk ni. Hannah in Topatawh sun tawh zan tawh phun in a ki ho lim ciangin na  lianpi a ma sung pan in hong piang khia hi.

7. Ih mailam kalsuan zia ding honglak nuam hi.

eg. India gam ah laisiang tho sang ka vakah  lai un, visa neih lona, sum neih lo na, cidam loh na, puan neih lo na,leh hak sat na tam pi te hang in ni sim in lung sim ki tapzan na te thuak in kaom uh a,tua tungtawn in Topa in,Up na tawh kal suan na hong sin sak a, gual zawh na lian pi te hong mu sak hi. Tu ni in pawl pi vai leh ni sim nun tak na ah  upnatawh hong kalsuan gam sak hi.

Thu Khup na:

Ih zak ngei sa mah bang in, khat vei lai in hei leh sek ki ho in,Sek in hei aw nang bang ut ing miten aliang ko tung ah hong pua in na om pen hong eng ing ci hi. Hei in na ut leh kei pen mei sa mah mah ah hong ki em khit teh, hong ki seek ngawp in,suang tat ah hong ki tat hiam hi a cih  leh, seh in tua a hih leh ut non dah ing ci hi. Topa mai ah ki phal tak in, Ki tapzan na leh ki tat hiam na om lo in  hong zang thei lo hi cih hong phawk sak hi.

Tu kum 2011 pen Year of promotion, ih cih mah bang in Topa in lei tung lam khalam hong khang to sak nuam a hih man in ih lam et loh lung sim, kha ki tapzan na te zong a tuak sa tawh a tuak lai ding tawh om kha thei ding ih hih man in, Topa hong ho pih na kammal a hi, hih lai tawh kong thapia khol nuam hi. Topa in Nang hong it hi,hong nusia het lo hi cih phawk den in. Topa in hi lai a sim kheempeuh thupha hong pia ta hen!!!Amen.

Rev.Vung Za Niang

no comment

Add your comment

Your email address will not be published.

%d bloggers like this: