|
Nengkia Thupha
(Mattiu 15:21-28)
Thupatna: Ama' khanlai in, ahaupen dinga akigen, Rockerfeller ii bangkua sunga ann nengkia leh annkhing khamval teng, kaikhawm in gankhawina aneipa, hauzo tanghial kici hi. Gamhaute in, na pen mawkpaih nawnlo uha,recycle bawl ci-in, tua nalui pen nathak suaksakkik uhi. Annkhing khamval leh ann nengkiate bang mawkpaih lo uha, recycle bawl uhin, atuaci a zatkik theih dingte zangkik uh. Tuaci a zatkik theih lo ding te, eklei hoih mahmah suaksak uha, tampipi man hi. Ann nengkia nangawn sum manpha suak tazen hi. Tuni in, Topa' sabuai tungpan ann nengkia thupha in Samson, akhangualte' lakah mihatpen suaksak hi. Tua Topa' ann nengkia thupha in Solomon, akhang akhang a ciapteh dingin ahaupen kumpi suaksak hi. Tua Toap' ann nengkia thupha in mi tul nga, kham takin vak in, seng 12 val lai hi. Tua Topa' ann nengkia thupha in, Jesu Khris sungah, nang-le-kei' ading inzong, khankhom ding bek tham loin, tawntung hun dongah khamkhop hong suak ding ahihi.
Akitamzan Lungtang leh Nengkia Thupha: Ih LST in awging khat ii thu hong gen hi. Tua awging pen lungdamna hang lei kisak theihn hang hilo a, minsialna leh gaaltouna awging zong hi lo hi. Lamet bei akisa, akitamzan lungtang sung pan hong phulkhia awging ahihi. Ahizongin, tua awging in Vantung dong kithawn in, Topa' bil avut hi (vv. 21-22). Ahizongin, Jesu in tua awging sungah bangteng kihel cih thei nuam ahih manin, dawng loin, angak hi. Hi awging pen, lamet bei numeinu' thungetna hi a, ama' adingin mundang ah lamet om nawn peuhmah loin, Jesu pen acih theih tawpna ahihi. Tua hi in, hi awging sungah lamet bei a kahna leh tauna bek hi kei. Khentatna lianpi zong kihel hi. Khentatna takpi pan hong gingkhia awging zong ahihi. Tua ahimanin, Jesu in adawng kei zongin, adawn masiah akikhiam peuhmah lo ding thungetna aw cih ding zong ahihi (vv. 23-25). Hih awging in Topa' nengkia thupha kipatna thusim ahihi.
Lungkimthei Upna leh Nengkia Thupha: Tuhun khang leitung pen thuneihna sangzaw, minleza lianzaw, thaman tamzaw ngetna awging tawh lumm lelua hi. Ahizongin, tua awging tuamtuamte' lakah Topa' cih bang, Topa' koih bang, Topa' piak bang tawh, "himah ei, Topa" ci-in alungkim thei upna, Topa in azong hi. Himun ah, Canaan numeinu' tauna awging tungah, atawpna a Jesu dawnkina na zaak ciang, na bangci ngaihsut hiam? Jesu, lawmlawm! Amigi tuucing ci-a, hi ci-a kam apau aw, na cikha ding ahi. Canaan numei nu hi loin, ei hi leng, tuadan in cikik, ngaihsunkik hamtang ding hi hang. Nuakpah giap ding hi hang. Neh piiksan pahlel ding hi hang. Lehtai pah vivet ding hi hang. Ahizongin, hi Canaan numeinu' upna pen tua dan hi lo hi. Topa' angvanna nuai ah om kha ding ahih nungsang, Topa' cih bangbang, Topa' koih bangbang, Topa' piak bangbang tawh, alungkim sawm ngiat! Ama' ui dinmun ahi-a, vok dinmun ahi zongin, zawngeu dinmun zong bang zolo ding ahiphial zongin, Topa' cih ahih nakleh akizosa in om hi mawk hi. Tua hi in, ni numei in, "Himah hi Topa" cih tawh na dawntuah lian hi." Ahizongin hi banga alungkim thei upna in, Topa' nengkia thupha honkhiatna thusim ahihi (vv. 26-27).
Deihcin Theihna Nengkia Thupha: Mi tampi in "sam (need)" leh "deih (want)" cih kammal tawh ommai in, Pasian pen acil mahmah. Ei' sapzah lian bek hong pia kuaukuau dan in tuat uhi. Ahizongin, himun ah Jesu' dawnkikna en in. GrikLST mahmah ah zong "na sap bangin" bek ci loin, "na deih (lunggulh) bangin piang ta hen" ci tektek hi. Ibiak Pasian in, acingh Pasian ahihi. Pasian, imuh dan khel ding hi hang. E'n pen, ei mahmah zong, cingh nuam lopah malam ihihmanin, Pasian zong acilkhia mahmah, sapzah bek hong pia tuaituai dan in gen mawkmawk hi hang. Na mawhna kisikkik in! Pasian in acingh Pasian ahihi. Nang zong cingh in, ci-in na gei a pen hopih in! Jesu in, Canaan numeinu' tungah sapcing bek ahi lo, deihcing nuntakna thak kamciam apia hi. Banghang hiam cih leh, amah in Jesu ngiat deih tentan masa ahihman ahihi.
Thukhupna: Mite' ann nengkia teng, sum met tampi suakthei ahileh, Van khateh kia in ei ading bangzah in manpha zawkan ding ahi hiam? Lungdamna thubu li te in, Topa Jesu in mipi tul tampi ann avakna nihvei ciamteh hi. Lai Siangtho thei kisa tampi in, tua bang dan om pahpah thei ke'n teh, khatvei bek pen, nihvei bangin akiciamteh, akitheikhial hizaw inteh ci mawkmawk uhi. Amau' sep tawm dingin atuat uciang, mi tul nga vak nading, alung-a-am lawh Philip leh nungzuipite mah bangin, alung uh am in, asi uh khang liang hi. Ahizongin, hi pen, nungzuite' sep ding hi kei. Amau' sep ding zong hi kei. Mi atul tampite nihvei bek hi lo, tuni tan zong, avan guahtui tawh hong van den, Pasian' hatna tawh sep ding ahihi. Tua hi in, nihvei zong tawmlua lai ka ci hi. Tudong, hong vak lai hizaw ka ci nuam hi. Tua banga Topa' vakna nalamdangte,sazian abawlkik uciang, seng 12 leh seng 7 bang val a, tua in, Topa' adingin lungkim taka akiphal, nanglekei' satan ding ahihi. Van khateh kia leh Topa' ann nengkia thupha!
|
Phone: 918-286 8673,918-286 8736
To know more about our service timeing and place please click here for detail.
Download itunes
