|
~ Lipa Kham Suan Pau, Aizawl
Tuni hun hoih hong ngahsak Pasian tungah lungdam ka ko hi. Champhai ZBC biakinn pen ka thugen cil, pulpit tunga ka thungen masak penpenna hi a, tua ka hun zat masak hunin, kuamahpi in hong thei lo, banah ken zong kuamah ka thei khol kei hi. Tua hun tawh ka ngaihsut ciangin tu hun a Pasian hong laptohnate thupi ka sa mahmah hi. Tu nitak hunin Pasian vanzat, Pasian zat theih hih nading lam tawh kisai, Lai Siangtho sunga Pasian vanzat tam lo tawh tha la khawm leng ka ci hi.
1. Anlum sagih leh ngasa neu tawmkhat : Matthai 15:32 pan i sim ciangin Jesu in mi tuli a vakna thu kimu hi. Hih lai mun ka sim ciangin, Bang hangin apiatheipa Jesu in mipite lakah nek ding a neih leh neihloh dong se hiam?cih ka lungsimah om hi. A mai lam i sim ciangin Jesu in ama thugen a ngai mite hehpihhuai a sakna thu leh, mipite mailam hunah a gil kial ding uh a launa zong kimu thei hi. Tua panin Pasian pen a mite mailam hun a khual tawntung ahihna kimu hi.
Jesu in mipite lakah nek ding a neih leh neihloh a dotna tawh kisaiin bang hangin dong hiam, i cih leh, Jesu in mipite a mawkna a piak ut lo hi. Amau neihsa panin a neih bangbang uh Jesu a piakhiat ding uh deihna hi. A piakkhiat uh a thupi mahmah laitakin, a pia mite lungsim, mipi lungsim a deihna hang ahi hi. Eite zong i sepna kibang lo, ngaihsutna kibang lo tuamtuam omkhawm i hi a, tua i sepna bangbang panin i lungsim piakkhiat ding hong deih hi. Ngah bekbek a lamen hi lo a, eimah in i piak masak zong kisam hi. I hihna bangbang, i Vaite in puja a neih uh ciang a lungsim khempeuh uh tawh a milim pasiante bia uh hi. Pilna pasian a biak uh bang ciangin a laibu teng khempeuh uh lakhiain, pilna pasian maiah koih uh a, tua tawh ki-ap khin uh hi.
I mimal, i pawlpi zong i lawhcin nadingin i hihna bangbang tawh Topa tungah ki-ap ni. Mi tul li anlum sagih leh ngasa neu tawmkhat tawh avaktheipa in thupha hong nak piak theih lua hi. Amah i muan ngamna zahzahin eite tungah na hong sem thei hi.
2. Ngen : Luka 5:1-11 sung i sim ciangin Genesaret tuili-ah Piter in zan thapai ngen a paihna leh, a lawhcinlohna kimu hi. Ahih hangin Jesu hong pai-in, a gunkuang tui thukna lamah hot ding leh, tua laiah a ngen khuh dingin sawl hi. Piter in, Sia aw, tu zanthapai ngasa ka khuh uh hangin khat zong ka man kei uh hi. Ahi zongin khuh in, nong cih leh, ka khuh ding hi,ci in dawng hi. Tua banga Jesu sawlna bangin a ngen a khuh ciangin ngasa tampi man hi.
Piter in a ngen pen a zatzatsa hi a, a paihdan zong nidanga a paihdan ngei mah ahi hi. Ahih zongin tuabang a ama ngeina banga a mat theihloh hun ciangin Jesu kammal kisam hi. Van a thupi hi lo a, a zangte pen Pasian tawh a kizop leh kizoploh in van manpha suakin suak lo thei hi. I kalsuanna-ah i haksat hun, i lawhsap hun, i guallelh hun, i gualzawh hun leh i hun zatna khempeuhah Pasian i kisam tawntung hi.
Tua banah, tua banga Piter in Jesu a muh a, a theihtel ciangin, Topa aw, kei mawhnei mi ka hih manin ka kiang panin paikhia inci a, a mihing lungsim khempeuh paaikhia-in, a lungsimah mawh kisakna piang hi. Tua pen Jesu deihpen ahi hi.
3. Ciangkhut : Israel mite Izipt panin Moses makaihna tawh a paikhiat uh ciang Pasian nasepna na lamdang tampi Moses tungtawnin mu uh hi. Ahih hangin a makai uh Moses a do bawl uh ciangin Pasian hehna amaute tungah tung mawk hi. I makaite thu i manlohna hangin eite tungah zong gimna hong tung thei hi. Gimna hun ciangin Moses khut sunga om vante zangin Pasian in na lamdang bawl zel hi. Moses a thupi hi lo a, vante a zang Pasian thupi hi.
Israel mite sehnel gam tui omlohna mun hong tung uh a, mipite in Moses a phunsan uh ciang, mipite mai-et dingin Moses tai kawikawi lo hi. Biakinn kikhopna maiah pai-in lei lakah boksuk hi kici hi. Hih munah makaite adingin etteh ding Moses tungah a hoih mahmah om hi. Kipawlna khat sungah buaina tuamtuam om lo thei lo hi. Tua buaina pen bangci phutsuak ding cih Moses in hong hilhcian mahmah hi.
Mipite in a phunsansan hun ciangin zong Moses linglawn lo a, a nasep khawl tuan lo hi. Pasian maiah kunin thungen a, Pasian tungah ki-ap zaw hi. Makai pawlkhatte in haksatna i tuah hun, pawl sungah buaina leh kilemlohna a om ciang Pasian i phawk kha kei hi. Tua bang makaihna nuaiah buaina lian semsem hi. Moses in kalsuanzia ding Pasian a dot ciangin Pasian in, Ciangkhut la inci a, nidanga a zatzatsa ciangkhut tungtawnin na lianpi sem hi. A ciangkhut a thupi hi lo a, a zatna Moses leh a zang Pasian kikal thu a hoih mana na lianpia sem hizaw hi. Na khut sungah bang om hiam?
Thukhupna : Tuni a ZBYF - AC a hong kihel khua tuamtuam khangno makaite, i khua lamah i ciah ciangin i makaih sepna-ah i lawhcin nadingin, i memberte in phattuamna a ngah nading, i pawlpi khantoh nading, i gam, i minam, i innkuan a khantoh theih nadingin Pasian tungah ki-ap ni. Haksat hun ciang amah beel ni. Aman hong khahsuah lo ding a, zong hong makaih khial ngei lo ding hi. Kisin ngam ni. Amah i belh a, a thu banga i nuntak leh na lianpi hong semsak ding hi. Topan thupha hong piaksak ta hen.
(Hih thu Upa Kham Suan Pau,
Pre. Elect, ZBYF in Nov. 18, 2011
zana ZBYF-AC biakpiak kikhop huna a gen hong kisuaksak hi)
Source:ZBYF laihawm
|
Phone: 918-286 8673,918-286 8736
To know more about our service timeing and place please click here for detail.
Download itunes
